د «یووالي او باور پر لور» تر سرلیک لاندې سیمه ییزه ناسته چې ټاکل شوې وه، راتلونکې اوونۍ (د اګست ۱۵ – ۱۶مه) اسلام آباد کې د افغان سیاسي او مدني فعالانو په شتون جوړه شي ځنډېدلې ده.
رخشانه: د افغان ښځو لپاره بنسټ نن (جمعه د زمري ۳۱ مه) په یوه مطبوعاتي خبرپاڼه کې اعلان کړی، چې دغه دوه ورځنۍ ناسته د سپټمبر میاشتې وروستۍ اوونۍ ته ځنډول شوې ده.
د جوړونکو په وینا، د وخت بدلون د دغه پېښې د لا ژور او جامع ډول جوړاوي لپاره فرصت برابروي.
د اعلامیې پر بنسټ، تمه کېږی، دا غونډه به د افغانستان او پاکستان، د سیاسي ډلو او مدني تولنې، د ښځو د حقونو فعالانو او رسنیو ټولنې سره راټولي کړي، تر څو د متقابل درک د رامنځ ته کولو، همغږۍ پیاوړتیا، ثبات، د قانون حاکمیت او د خلکو له خوا د ټاکل شوي دولت د جوړولو لپاره د ګډو اصولو د تعریف کولو په لارو چارو خبرې اترې وکړي.
دغه خبرې اترې د افغانستان د مسایلو پر محوریت او د سویلي آسیا د ستراتېژیک پوهنتون په همکارۍ، چې یو پاکستانی بنسټ دی تر سره کېږی.
جوړونکو د دې غوندې موخه باور رامنځ ته کول، د خلکو پر محور د سیمه ییزه ستونزو د حل لپاره د کړنلارو پراختیا او په افغانستان کې د تل پاتې او باعزته سولې لپاره د لارې هوارول ښودلي دي.
اعلامیه کې ټینګار شوی، چې دا ناسته به د «اسلام آباد پروسې» پیلوونکې وي، هغه پروسه چې د افغانستان او پاکستان د دوه ملتونو تر منځ د همغږۍ، باور او همکارۍ لپاره پلان شوې ده.
دا په داسې ده، چې د طالبانو له واکمنۍ څلور کاله وروسته اسلام آباد په لومړي ځل د دغه ډلې د مخالفانو کوربه توب په غاړه اخلي، خو دې موضوع غبرګونونه هم راپارولي دي.
د افغان سولې لپاره د امریکا پخواني ځانګړي استازي زلمي خلیلزاد تېره اوونۍ پر پاکستان د دغه ناستې د کوربه توب له امله نیوکه وکړه او ادعا یې کړې، چې دا برنامه د پاکستان د استخباراتو (آی اېس آی) په ملاتړ جوړېږي، خو د ناستې جوړونکو دا موضوع په کلکه رد کړه.
