العربیه راپور ورکړی، چې د طالبانو مشر هبت الله اخوندزاده، په افغانستان کې د نجونو د دیني مدرسو د تړلو امر هم ورکړی، ځکه چې د ریاضي، ساینس او ژبو زده کړې په کې ورکول کېدې.
رخشانه: دغه امر د طالبانو د کابینې په وروستۍ غونده کې، چې تېره اوونۍ په کندهار کې تر سره شوې ده، ورکړل شوی دی.
طالبانو د ۲۰۲۱ کال په اګست میاشت کې واک ته له بیا رسېدو وروسته د هېواد په ګوټ ګوټ کې سلګونه بابه دیني مدرسې جوړې کړې او هر کال په دغه مدرسو کې زده کوونکو ته د زده کړو په پار زیاتې پیسې لګوي.
په دې ناسته کې د طالبانو مشر په شفاهي ډول، د دغه ډلې د پوهنې او لوړو زده کړو وزارتونو امر کړی، چې په دیني مدرسو کې په تدریجي توګه د نجونو نوم لیکنه ودروي.
نوموړي په دې ناسته کې ویلي، په دیني مدرسو کې نوي علوم، لکه ریاضي، ساینس او ژبې تدریس کېږي او دا یوازې په نوم «دیني مدرسې» دي.
د راپور پر بنسټ، د طالبانو د مشر د دې پرېکړې په پلي کېدو کې به لومړی ګام دا وي، چې له دیني مدرسو فارغو شویو نجونو ته به د فراغت سند نه ورکول کېږي.
تر اوسه د طالبانو د پوهنې او لوړو زده کړو وزارتونو د خپل مشر د نوې پرېکړې په اړه غبرګون نه دی ښودلی.
طالبانو د ۲۰۲۱ په اګست کې واک ته تر بیا رسېدو وروسته، له شپږم ټولګي پورته نجونې له ښوونځیو او په پوهنتونونو کې له زده کړو بندې کړې دي.
دغې ډلې په خپله څلور کلنه واکمنۍ کې د بشري حقونو بنسټونو، نړیوالې ټولنې، ملګرو ملتونو او ښځو د حقونو د فعالانو د غوښتې پر عکس، د نجونو پر مخ د ښوونځیو او پوهنتونو دروازې نه دي پرانستې.
