هرات ښار کې سیمه ییزه سرچینې وايي، طالبانو د یوه کس په مرمیو ویشتل شوی جسد د ښار په یوه څلور لاري، چې په کندهار دروازه پېژندل کېږي «له پښو ځړولی» او د خلکو نندارې ته یې وړاندې کړی دی.
رخشانه: هرات کې دوه ځايي سرچینو رخشانې رسنۍ ته تایید کړه، چې د دغه کس جسد تېره ورځ(جمعه د زمري ۳۱ مه) د هرات ښار د کندهار دروازې په څلور لاري د څو ساعتونو لپاره د خلکو نندارې ته وړاندې کړی وو.
په ټولنیزو شبکو په خپرو شویو ویډیويي انځورونو کې ښکاري، چې طالب ځواکونه د لسګونو خلکو پر وړاندې، د دغه کس جسد په ستوني او خوله کې په لغتو وهي.
طالب ځواکونو د دغه جسد پر مخ لیکلي«مرګ دې وي د افغانستان پر انقلابي ډلې».
هرات کې د طالبانو امنیه قوماندانۍ هم د دغه کس په وینو لړلي جسد د یوه انځور په خپرولو سره اعلان کړی، چې یو غل د دغه ډلې سره په جګړه کې وژل شوی دی.
طالبان وايي، دغه کس د دوی د ډلې دوه امنیتي سرتېري وژلي دي.
طالبانو په خپله څلور کلنه واکمنۍ کې په وار وار په یو شمېر ولایتونو کې په بېلا بېلو تورونو له هغې، د دوی له مخالفو ډلو یا داعش سره د تړاو په تور یو شمېر کسان ویشتلي او کله کله یې د هغوی جسدونه هم د خلکو نندارې ته وړاندې کړي دي.
دغه ډول سزاوې په ۹۰ مه میلادي لسیزه کې د طالبانو د لومړۍ دورې واکمنۍ د کړنو یادونه کوي، چې دې ډلې د خلکو پر وړاندې په لوبغالو کې په صحرايي محکمې سره قصاص تر سره کاوه.
د طالبانو دغه چلند د بشري حقونو د فعالانو تر سختو نیوکو لاندې دی. د بشري حقونو له مخې، په عامه ځایونو کې د جسدونو پرېښودل یو سخت غیر انساني، له سپکاوي ډک او انساني کرامت څخه لرې عمل دی.
