سیمه ییز طالب چارواکي وايي، د هلمند ولایت ګرمسېر ولسوالۍ کې د یوې ۳۰ کسیزه کښتۍ د ډوبېدو له امله درې ښځي او ۹ ماشومان مړه شوي او ۴ تنه نور ټيان شوي دي.
رخشانه: هلمند کې د طالبانو د اطلاعاتو او کلتور رییس حافظ عبدالباري راشد ویلي، دغه پېښه تېره ورځ (جمعه د زمري ۳۱ مه) د دې ولایت د ګرمسېر ولسوالۍ په «پنجاو» سیمه کې رامنځ ته شوې ده.
پېښه هغه مهال رامنځ ته شوې، چې د کښتۍ سورلي له ګرمسېر د ناوې ولسوالۍ پر لور روان وو او دوی ټېکټر او ګاډی هم په کښتۍ کې بار کړي و او غوښتل یې له سیند نه تېر شي.
په دې کښتۍ کې ۳۰ تنه سپاره وو چې هلمند سیند کې ډوبه شوې او په پایله کې یې درې مېرمنو او ۹ ماشومانو ژوند له لاسه ورکړی او څلور تنه نور ټپیان شوي دي.
د هلمند ولایت د اطلاعاتو او کلتور رییس د دغه پېښې د ټپیانو د هویت او روغتیايي حالت په اړه څه نه دي ویلي.
نوموړي زیاته کړې، د کښتۍ ۱۴ تنه نوره سورلي له اوبو ژوندي ژغورل شوي. د دغه کسانو هویت او جنسیت هم نه دی معلوم شوی.
