هرات ښار کې سیمه ییزه سرچینې وايي، د دې ښار په اتمه ناحیه کې یو سړي خپله مور، مېرمن او لور د چړې په ګزارونو وژلې دي.
رخشانه: هرات ښار کې یوې سرچینې د هویت پټ ساتلو په شرط رخشانې رسنۍ ته ویلي، دغه پېښه د یکشنبې په شپه (د وږي ۲ مه) ۱۰:۳۰ بجې د ښار د ګلستان واټ د «باغ نظرګاه» په سیمه کې رامنځ ته شوې ده.
د سرچینې په وینا، دغه سړي چې خپله مور، مېرمن او لور یې وژلې، په نشه يي توکو روږدی وو او له قتل وروسته له سیمې تېښتېدلی دی.
سرچینې و ویل«دغه سړی په نشه روږدی وو، مخکې یې هم مېرمن ګواښله، چې تاسو ټول وژنم، تېره شپه یې د چړې په واسطه خپله ښځه په زړه کې وهلې، وروسته یې مور او ۱۳ کلنه لور هم د چړې په ګزارونو وژلې دي.»
د رخشانې رسنۍ سرچینې د قربانیانو د هویت او قتل د لامل په اړه نور جزیات نه دي ورکړي.
تر اوسه دا هم نه ده معلومه، چې دغه سړی نیول شوی که څنګه.
هرات ولایت کې سیمه ییزه طالب چارواکو هم تر اوسه په دې اړه څه نه دي ویلي.
د طالبانو بیا واک ته په رسېدو سره د هېواد په یو شمېر ولایتونو کې د ناموسي وژنو او کورني تاوتریخوالي په نوم د ګڼ شمېر ښځو او نجونو د وژل کېدو راپورونه ورکړل شوي دي.
