د ژغورنې نړیوالې کمېتې (IRC) اعلان کړی، چې د هېواد څلورو ختیځو ولایتونو کې، د مرګونې زلزلې د قربانیانو د مرستې لپاره بېړني روغتیايي ټیمونه لېږي.
رخشانه: یاد بنسټ نن (دوشنبې د وږي ۱۰ مه) په یوه اعلامیه کې لیکلي، دغه ټیمونه به هغه سیمو ته ولېږل شي، چېرته چې د ریشتر په کچه ۶ درجې زلزله شوې او کم تر کمه ۸۰۰ تنه په کې مړه شوي دي.
د ژغورنې نړیوالې کمېتې ویلي، د دغو زلزلو له امله پر انساني مرګ ژوبلې سربېره، کورونو او روغتیايي مرکزونو ته هم سخت زیان رسېدلی دی.
یادې کمېتې لیکلي، د ځپل شویو سیمو منځ کې ځینې کلي په بشپړه توګه ویجاړ شوي او د سختو بارانونو، سېلابونو او زلزلو له امله غرنیو سیمو ته لاس رسی ستونزمن دی.
د ژغورنې نړیوالې کمېتې ټينګار کړی، چې له نورو فعالو بنسټونو سره په همغږۍ هڅه کوي، د لومړنیو اړتیاوو او بشپړو زیانونو کچه واخلي.
دغه راز یاد بنسټ ویلي، ډېر ژره بېړني ګرځنده روغتیايي ټیمونه په ننګرهار او لغمان ولایتونو کې ځای پر ځای شي.
په افغانستان کې د ژغورنې کمېتې مدیر شرین ابراهیم وايي، وروستۍ زلزلې ښايي په ۲۰۲۳ کال کې، د هرات ولایت د زلزلې له امله رامنځ ته شوې بشري اړتیاوې تر اغېزې لاندې راولي.
هغه زیاته کړې:«د ژغورنې نړیوالې کمېتې ننګرهار او لغمان ولایتونو ته د یوه ټیم په لېږلو سره روغتیايي خدمتونه لکه لومړنۍ مرستې، د میندو او نوزېږدو ماشومانو د روغتیايي وضعیت څارنه، درمل او روغتیايي تجهیزات وړاندې کوي.
د ژغورنې نړیوالې کمېتې مدیرې و ویل:«د هغه اضافي فشار په اړه اندېښمن یوو، چې دا طبیعي ناورین به په افغانستان کې د بشري خدماتو په رسولو باندې اغېز وکړي.»
هغه خبرداری ورکړی، چې د نړیوالې بودجې د پام وړ کموالي، په افغانستان کې د روان بشري ناورین د ځواب ویلو لپاره د دغه بنسټ وړتیا ګډوډه کړې ده.
ابراهیم له نړیوالې ټولنې غوښتي، چې د اړتیاو په درک کولو سره په افغانستان کې د اړمنو کسانو سره مرستې زیاتې کړي.
