د ماشومانو د خوندیتوب بنسټ (Save The Children) وايي، په کونړ، ننګرهار، نورستان او لغمان ولایتونو کې د مرګونې زلزلې څخه زیانمن شوي ماشومان بېړنیو مرستو ته اړتیا لري.
رخشانه: دغه بنسټ نن (سه شنبه د وږي ۱۱ مه) پر خپله وېب پاڼه د یوې خبرپاڼې په خپرولو سره د هېواد په ختیځ کې د زلزله ځپلو په ځانګړې توګه د ماشومانو سره د بېړنیو مرستو غوښتنه کړې ده.
تر اوسه معلومه نه ده، چې د هېواد په ختیځ کې مرګونې زلزلې څومره ماشومانو ته مرګ ژوبله اړولې. خو د سیمه ییزه رسنیو د راپورونو پر اساس د دغې زلزلې ډېری قربانیان ښځې، ماشومان او زاړه خلک دي.
د ماشومانو د خوندیتوب بنسټ وايي، د ریشتر په کچه ۶ درجې زورورې زلزلې د افغانستان ختیځ ولړزاوه، چې له امله یې په څلورو ولایتونو کې سلګونه کسان مړه او زرګونه نور ټپیان شوي دي.
یاد بنسټ زیاته کړې، دوی زیانمنو سیمو په ځانګړې توګه کونړ ولایت ته، چېرې چې تر اوسه د مړو شمېر ۱۴۰۰ تنو ته رسېدلی، ګرځنده روغتیايي ټیمونو لېږلي، چې په کار بوخت دي.
د یاد بنسټ په وینا، هغه ماشومانو چې له زلزلې روغ وتلي، د یوازیتوب، وېرې او زیان سره مخ دي.
د ماشومانو د خوندیتوب بنسټ زیاته کړې، په هغه ځایونو کې، چې کورونه وران شوي، ماشومان بېړنۍ سرپناه او بېړنیو کمکي توکو ته ښايي اړتیا ولري.
د وروستیو شمېرو له مخې د کونړ ولایت په شپږو ولسوالیو کې د زلزلې د مړو شمېر یوزر او ۴۱۱ تو او د ټپیانو شمېر ۳ زره او ۱۲۴ تنو ته رسېدلی دی.
