غور کې سیمه ییزه سرچینې وايي، د دې ولایت په لعل و سرجنګل ولسولۍ کې لسګونه ښځینه ښوونکې، د یادې ولسوالۍ لرې پرتو سیمو ته تبدیلې کړې دي.
رخشانه: د غور په لعل و سرجنګل ولسوالۍ کې دوه سیمه ییزه سرچینو رخشانې رسنۍ ته و ویل، دغه ښځينه ښوونکې د دې ولسوالۍ د امربالمعروف آمریت په امر تبدیل شوې دي.
د رخشانې رسنۍ سرچینې مشخصه نه کړه، چې څومره ښځینه ښوونکې د لعل و سرجنګل ولسوالۍ لرې پرتو سیمو ته تبدیلې شوې دي.
د سرچینې د خبرو پر بنسټ، دغه ښځينه ښوونکو چې وړاندې د خپلو استوګنې ځایونو ته نېږدې ښوونځیو کې تدریس کاوه، اوس د دغې ولسوالۍ لرې پرتو سیمو ته تبدیلې کړای شوې دي.
یوې سیمه ییزې سرچینې و ویل:«ښوونکې په هغه کمه تنخوا چې تر لاسه کوي یې، لرې پرتو ښوونځیو ته د تګ راتګ توان نه لري.»
د سرچینې په وینا، طالبانو د ښوونکو د زړه سړولو په موخه، هغوی د لرې پرتو سیمو ښوونځیو ته تبدیلې کړې دي.
په دغې ولسوالۍ کې یوې بلې سرچینې رخشانې رسنۍ ته ویلي، ډېری ښوونکې چې لرې پرتو ښوونځیو ته تبدیلې شوې، پرېکړه کړې، چې خپلې دندې پرېږدي.
هغه و ویل:«هغه ښځینه ښوونکې، چې په یوازې توګه لرې پرتو ښوونځیو ته تګ راتګ نه شي کولی، اړ دي چې هره ورځ په موټر سایکل تګ راتګ وکړي او دا د هغوی له توان نه وتلی کار دی. هېڅوک دې ته چمتو نه دي، چې خپله ښځه یا خور چې ښوونکې دي، هره ورځ ښوونځي ته ورسوي.»
غور ولایت کې سیمه ییزه طالب چارواکو تر اوسه د دغه ادلون بدلون په اړه څه نه دي ویلي.
طالبانو د ۲۰۲۱ کال په اګست کې بیا واکمنۍ ته په رسېدو سره ښځې او نجونې په دولتي ادارو، خصوصي او بهرنیو بنسټونو کې له کار کولو راوګرځولې.
