د افغانستان د بشري حقونو مرکز (AHRC) د هېواد په ختیځ کې د مرګونې زلزلې په تړاو وايي، د زلزلې له امله د زیانمنو ښځو سره مرستې کول باید د مرستندویه بنسټونو له لومړیتوبونو وي.
رخشانه: یاد مرکز نن (چهارشنبې د وږي ۱۲ مه) د یوې اعلامیې په خپرولو سره د هېواد په ختیځ کې د زلزلې له قربانیانو سره خواخوږي ښودلې ده.
د افغانستان د بشري حقونو مرکز ویلي، د هېواد په ختیځ کې د دغه مرګونې زلزلې له امله تر یو زر ۴۰۰ زیات کسانو ژوند بایللی و زرګونه نور ټپیان شوي دي.
د یاد مرکز په اعلامیه کې د ښځو پر وړاندې د طالبانو محدویتونو ته په اشارې راغلي، ښخو ته د مرستو رسېدو په برخه کې د طالبانو له محدویتونو «په ژوره توګه» اندېښمن دي.
اعلامیه کې راوړل شوي:«د ښځو پر وړاندې د طالبانو توپیري چلنده ډک سیاستونو د ګڼو مېرمنو ځان له ګواښ سره مخ کړی دی، چې کېدای شي له ژغورنې او یا مرستې څخه پاتې شي.»
د بشري حقونو مرکز په ۲۰۲۳ کال کې هرات کې ځمکلړزې او زیانمنو ته د مرستو رسولو برخه کې پر ښځو محدویتونو ته په اشارې ویلي، دغه تجربه باید بیا تکرار نه شي.
دغه مرکز ټينګار کړیو چې د ښخو ځان او امنیت باید د مرستو رسولو په ټولو هڅو کې په لومړیتوب کې ځای ولري او خوندي وي.
د افغانستان د بشري حقونو د مرکز مشرې ډاکتر سیما سمر ویلي، د ناورینونو سره د مقابلې لپاره د کټورو جوړښتونو نشتوالی او لرې پرتو او غرنیو کلیو ته د لاسرسي ستونزې د نورو تلفاتو ګواښ زیاتوي.
هغې زیاته کړې، مرستندویه بنسټونه باید له قید و شرط او هر ټول توپیر پرته زلزله ځپلو په ځانګړې توګه ښخو ته خدمات وړاندې کړي او ښخې نه باید په دې«طبعي ناورین» کې هېرې کړای شي.
د افغانستان د بشري حقونو مرکز له نړیوالې ټولنې او مرستندویه بنسټونو د هېواد ختیځ کې د مرګونې زلزلې قربانیانو ته د مرستو رسولو غوښتنه کړې ده.
یاد مرکز دغه راز له ایران او پاکستان هېوادنو غوښتي، چې له افغان کډوالو ملاتړ ته دوام ورکړي او په دغه بحراني وضعیت کې، افغانستان ته د هغوی له ایستلو ډډه وکړي.
