د طالبانو مرستیال ویاند حمدالله فطرت وايي، کونړ ولایت کې د یکشنبې د شپې د زلزلې د مړو شویو کسانو شمېر یوزر او ۴۵۷ تنو ته رسېدلی دی.
رخشانه: فطرت نن (چهارشنبې د وږي ۱۲ مه) په خپله اېکس پاڼه د یوه پوسټ په خپرولو سره لیکلي، د دغې زلزلې د ټپیانو شمېر ۳ زره او ۳۹۴ تنو ته رسېدلی دی.
د طالبانو مرستیال ویاند وايي، د کونړ په بېلا بېلو سیمو کې ۶ زره او ۷۸۲ د استوګنې کورونه ویجاړ شوي دي.
هغه زیاته کړې، چې د ژغورنې ټیمونو د له کنډوالو او خاورو لاندې ایسارو کسانو د را ایستلو عملیاتو ته دوام ورکړی دی.
د دغه مرګونې طبعي پېښې تر ټولو ډېری قربانیان او ټپیان ښځې، ماشومان او عمر خوړلي کسان دي.
د فطرت په وینا، د دې طبعي پېښې ټپیان د درملنې په موخه د چورلکو پر مټ روغتونونو ته لېږدول شوي دي.
هغه ټينګار کړی، چې ډېری زیانمن شوي کسان تر پوښښ لاندې دي او د هغوی وضعیت ته رسېدنه شوې ده.
د زلزلې په سیمه کې تړل شوې لارې هم د تګ راتګ پر مخ پرانستل شوې او ټول مرستندویه بنسټونه د خلکو په همکارۍ هڅې کوي، تر څو له زیانمنو سره مرسته وکړي.
افغاني سرې میاشتې ټولنې پرون ماښام اعلان کړی و، چې کونړ کې د زلزلې د مړو شویو کسانو شمېر یوزر او ۱۲۴ تنو ته زیات شوی او درې زره او ۲۵۱ تنه نور ټپیان شوي دي.
د زلزلې څخه د دریو ورځو په تېرېدو تر اوسه پورې د کنډوالو او خاورو لاندې کسانو د ژغورنې عملیات دوام لري.
