سمنګان کې سیمه ییزې سرچینې وايي، د دې ولایت په خلم ولسوالۍ کې د یوې ښځې چې «په پټه او ناوړه توګه» وژل شوې، جسد موندل شوی دی.
رخشانه: د سمنګان ولایت خلم ولسوالۍ کې لږ تر لږه دریو سیمه ییزه سرچینو رخشانې رسنۍ ته ویلي، د دغې مېرمنې جسد تېره ورځ (سه شنبې د وږي ۱۱ مه) د یادې ولسوالۍ په شباغلي دښته کې موندل شوی دی.
د رخشانې رسنۍ سرچینې وايي، د دغه ښځې پر بند د وهلو ټکولو او ربړونې آثار ښکاري.
د سرچینې په وینا، د دغه ښځې، پر مخ، لاسونو او پښو کې ژور ټپونه معلومېږي.
تر اوسه د دې ښځې هویت، عمر او د وژنې دلیل روښانه نه دی.
سرچینې زیاته کړې، چې د هغې جسد د پېژندنې په موخه د سمنګان ولایت روغتون ته لېږدول شوی دی.
سمنګان ولایت کې سیمه ییزه طالب چارواکو هم تر اوسه د دې وژنې په اړه څه نه دي ویلي.
واک ته د طالبانو په بیا رسېدو سره د هېواد په یو شمېر ولایتونو کې پټې وژنې او جنايي جرمونه بې مخینې زیات شوي دي.
د طالبانو ډله دغه ډول وژنې زیاتره د کورنیو ستونزو له امله بولي.
