له پاکستان نه د افغان کډوالو د نیولو او ایستلو لړۍ په ترڅ کې د دغه هېواد پولیسو د بشري حقونو یوه افغان فعاله نیولې ده.
رخشانه: د بشري حقونو فعالې فاطمې بختیاري په یوه ویډیو کې چې رخشانې رسنس ته یې لېږلې، وايي، د چهارشنبې په شپه د (وږي ۱۲ مه) نیول شوې او «کمپ» ته وړل شوې ده.
معلومه نه ده، چې د بشري حقونو دغه فعاله د پاکستان په کوم ښار کې نیول شوې ده.
په دغه ویډیو کې مېرمن بختیاري په اندېښنې او ژړا سره د مرستې غوښتنه کوي.
هغې ادعا کړې، چې په دې وروستیو کې یې په پټه ژوند کاوه، خو د پاکستاني پولیسو له خوا ونیول شوه.
د بشري حقونو دغې فعالې، د طالبانو تر واک لاندې افغانستان ته د ایستلو څخه اندېښنه څرګندوي.
پاکستان په تېرو وروستیو څو میاشتو کې د بشري حقونو د فعالانو، معترضه مېرمنو او پخوانیو افغان نظامیانو د نیولو لړۍ ته زور ورکړی دی.
له پاکستان څخه د افغان کډوالو ایستلو لړۍ د بشري حقونو د فعالانو او بشري حقونو د بنسټونو غبرګون راپارولی او له دغه هېواد څخه یې د افغان کډوالو د نه ایستلو غوښتنه کړې ده.
