د ملګرو ملتونو سرمنشي انتونیو ګوترش وايي، نړۍ کې د وسله والو نښتو په پایله کې د ماشومانو پر وړاندې تاوتریخوالی هم زیات شوی دی.
رخشانه: ښاغلي ګوترش نن (سه شنبې د وږي ۱۸ مه) په خپله اېکس پاڼه د یوه پوسټ په خپرولو سره لیکلي، د ماشومانو پر وړاندې تاوتریخوالي له زیاتوالي سره یو ځل بیا زده کړې تر برید لاندې راغلې دي.
ګوترش په دوام وايي، هېڅ ماشومان باید د زده کړو لپاره ځان له ګواښ سره مخ نه کړي.
د ملګرو ملتونو سرمنشي ټینګا کړي، چې د زده کړو لپاره د هر ماشوم اساسي حق باید په امنیت او سوله کې خوندي وساتل شي.
ملګروملتونو د روان کال په پسرلي کې په یوه راپور کې لیکلي، په جګړه کې ښکېل هېوادونو کې ماشومان«له هوساینې، لوبو او خوندي زده کړو برخمن نه دي.»
ملګرو ملتونو ټينګار کړی وو، چې د افغانستان، کانګو، سومالیا او نایجریا په څېر هېوادونو کې د ماشومانو وضعیت د اندېښنې وړ دی.
د شمېرو له مخې یوازې په ۲۰۲۳ میلادي کال په نړۍ کې ۱۱۶۴۹ ماشومان د وسله والو جګړو له امله وژل شوي یا معلول شوي دي.
د امریکا د بهرنیو چارو وزارت هم څه موده وړاندې په یوه راپور کې لیکلي وو، طالبانو سره له دې چې د جګړې لپاره د ماشومانو جذب او ګمارنه ممنوع ده، سلګونه ماشوم سرتېري لري.
ملګرو ملتونو په کال ۲۰۲۳ میلادي کې د طالبانو له لوري د جګړې او ملاتړو رولونو لپاره د ۳۴۲ ماشومانو ګمارنه مستنده کړې ده. له دې ماشومانو ۱۵۰ تنه یې په جګړو او ۱۹۲ تنه نور یې په «ملاتړو رولونو» کې کارول شوي دي.
د دې راپور پر اساس، طالبانو بدخشان کې کابو ۳۰ ماشومان چې عمرونه یې له ۱۰ تر ۱۸ کلونو دي ګمارلي او په یوه ځانګړي نظامي مرکز کې یې هغوی ته پوځي زده کړې ورکړې دي.
