افغانستان کې د ملګرو ملتونو د ماشومانو د ملاتړ صندوق (یونیسف) اعلان کړی، چې کونړ کې د مرګونې زلزلې له امله ۷۳۱ ماشومانو ژوند له لاسه ورکړی دی.
رخشانه: یونیسف تېره ورځ(دوشنبې د وږي ۱۷ مه) په یوه راپور کې لیکلي، چې له دې ډلې ۳۹۳ تنه یې نجونې او ۳۳۸ نور هلکان دي.
د ملګرو ملتونو د ماشومانو د ملاتړ صندوق ویلي، کونړ کې دغه زلزلې او د هغو وروستیو ټکانونو ۱۹ زره او ۷۸۱ ماشومانو ته زیان رسولی دی.
دغه بنسټ وايي، د ۱۹ زره څخه زیاتو ماشومانو منځ کې ۱۰ زره او ۲۹۹ نجونې او ۹ زره او ۴۸۲ تنه نور هلکان دي.
یونیسف زیاته کړې، دغه شمېر ماشومان کونړ کې د لوی ۶ او ۶.۲ درجې زلزلې او د هغې وروستیو ټکانونو او له ۵ درجې پورته زلزلې قرباني شوي دي.
د دې بنسټ په وینا، د دغې طبیعي پېښې په پایله کې، له دوه زره او ۲۰۵ زیات کسان مړه شوي او درې زره او ۶۴۰ نور ټپيان شوي دي.
یونیسف ټينګار کړي، چې د زلزلې ډېری زیانمن ماشومان دي.
دغه بنسټ وايي، د روغتیا، تغذیې، پاکو اوبو، رواني – ټولنیز ملاتړ او نغدي مرستو برخو کې د بېړنیو خدماتو په وړاندې کولو سره له زیانمن ماشومانو ملاتړ کوي.
یونیسف زیاته کړې، له شپږ زره او ۷۰۰ زیات کورونه په زلزله او د هغې وروستیو ټکانو کې په بشپړه یا هم جزيي توګه ویجاړ شوي دي.
