پر رسنیو د طالبانو د محدویتونو په لړ کې بلخ کې باوري سرچینې وايي، په دغه ولایت کې د طالبانو تر کنټرول لاندې ملي تلوېزیون خپرونې بندې شوې.
رخشانه: د دغه انځوریزې رسنۍ خپرونې د پرون ماښام(سه شنبې د وږي ۱۸ مه) درول شوې دي.
د سرچینې په وینا، د بلخ ملي تلوېزیون نشرات، د طالبانو د امربالمعروف ادارې او دغه ولایت لپاره د طالبانو د والي محمد یوسف وفا په امر بند شوي دي.
د رخشانې رسنۍ سرچینې زیاته کړې، د دغه تلوېزیون د خپرونو په بندېدو سره له ۱۰ زیاتو خبریالانو او رسنیزه کارکونکي بې دندې او پر کور کېناستل.
تر اوسه پورې په ۲۰ ولایتونو کې پر تلوېزیونو د ساه کښو د انځورونو خپرول د طالبانو له لوري بند کړای شوي دي.
د بلخ ملي تلوېزیون د خپرونو بندېدل په دغه ولایت کې د یو شمېر خبریالانو د اندېښنې سبب شوی دی.
بلخ کې خبریالان د طالبانو دغه اقدام، په دې ولایت کې د ساه کښو انخورونو د بشپړ نه خپراوي او ممنوعیت پیلامه بولي.
تر اوسه د افغانستان د خبریالانو مرکز او نورو رسنیزو بنسټونو په دې اړه غبرګون نه دی ښودلی.
په تېرو څلورو کلونو کې پر رسنیو او رسنیزو فعالیتونو د طالبانو سخته محدویتونه د دې لامل شوي، چې لسګونه غږیزې، تصوري او چاپي رسنۍ بندې شي.
یادې ډلې په دغه موده کې لسګونه خبریالان، د رسنیو کارکوونکي او فعالان نیولي او بندیان کړي دي.
