د ماشومانو د ساتنې سازمان (save the children) د هېواد په ختیځ کې د مرګونې زلزلې وروسته اعلان کړی، چې په زلزله ځپلو سیمو کې تر پنځه کلنۍ ټیټ، کابو ۳۷ زره ماشومان او ۱۰ زره امیدواره او شېدې ورکوونکې مېرمنې له سختې خوارځواکۍ سره مخ دي.
رخشانه: دغه بنسټ تېره ورځ ناوخته«سه شنبې د وږي ۱۸ مه) په یوه راپور کې لیکلي، د افغانستان ختیځ زلزله ځپلو سیمو کې له ۹۱ زره زیات کسان د تغذیې ملاتړ ته اړتیا لري.
په دې راپور کې راغلي، د هېواد په ختیځ کې د وروستۍ زلزلې له امله، لږ تر لږه ۱۶ زره روغتیايي مرکزونو زیان لیدلی او یو له دغه مرکزونو په بشپړه توګه ویجاړ شوی دی.
راپور کې راوړل شوي، په روان میلادي کال کې شاوخوا ۸۰ کلېنیکونه یا ګرځنده روغتیايي مرکزونه چې د هېواد ختیځ کې د ټولو روغتیايي مرکزونو ۹ سلنه جوړوي، د مرستو د کمېدو له امله تړل شوي، چې له امله یې کابو ۵۶۴ زره کسان اغېزمن شوي دي.
د ماشومانو د ساتنې بنسټ بنسټ ټينګار کړی، چې د افغانستان په ګوټ ګوټ کې شاوخوا ۴۲۲ روغتیايي مرکزونه د بودجې د کمښت له امله ځنډول شوي او دې مسلې ژغورونو روغتیايي خدماتو ته د درې میلیونه کسانو لاسرسی راکم کړی دی.
دغه بنسټ د هېواد په ختیځ کې زلزلې او د هغې وروستیو ټکانونو ته په اشارې ویلي، دغه طبیعي پښه د ۷۵۰ ماشومانو په ګډون د شاوخوا ۲۲۰۰ کسانو د مړینې سبب شوې، هغه هم په داسې وخت کې، چې افغانستان د ماشومانو د خوراځواکۍ له ناورین سره مخ دی.
راپور کې راغلي:«نېږدې پنځه میلیونه ماشومان، چې کابو ۲۰ سلنه یې د «ناورین» یا «بېړنۍ» کچې د خوړو کمښت سره مخ دي او داسې اټکل کېږي، چې سږ کال به له دغه ماشومانو ۳.۵ میلیونه په خوارځواکۍ اخته شي.
د ماشومانو د ساتنې بنسټ د ماشومانو لپاره راوني ټولنیز ملاتړ، د اوبو او روغتیايي ساتنې خدماتو، د کورنیو او حفظ الصحې کېټونو او د څو موخو لپاره د نغدو پیسو مرستو په چمتو کولو سره د زیانمنو خلکو ملاتړ کړی دی.
دغه بنسټ ویلي د سپټمبر په لومړۍ نېټه له زلزلې وروسته، تر اوسه پورې له ۱۲ زره زیاتو کسانو چې ۷ زره یې ماشومان دي د خدماتو په وړاندې کولو ملاتړ شوی دی.
په افغانستان کې د ماشومانو د ساتنې بنسټ د پروګرامونو او ملاتړ برخې مشرې سیمرا سید رحمان ویلي، د ماشومانو خوارځواکي یو بېړنی ملي وضعیت دی، ویجاړونکې زلزلې دغه کړکېچ لا ژور کړی دی.
هغې زیاته کړې:«هغه ماشومان چې له خوارځواکۍ کړېږي، د نورو ماشومانو په پرتله یې د ماشومتوب په دوره کې د عامو ناروغیو له امله مړینه ۱۱ ځله ډېره ده، کله چې زلزلې راشي، دا ګواښوونه څو برابره زیاتېږي.»
