د افغانستان لپاره د ملګرو ملتونو ځانګړي استازي ریچارډ بنټ وايي، طالبان دې د ملګرو ملتونو سازمان پر ښځینه کارکوونکو بندیر لغوه کړي.
رخشانه: بنټ پرون (جمعه د وږي ۲۱ مه) ناوخت پر خپله اېکس پاڼه د یوه پوسټ په خپرولو سره په «ملي کچه» د ملګرو ملتونو له ښځينه کارکونکو د محدویتونو د لرې کولو غوښتنه کړې ده.
هغه لیکلي:«کارځای ته د ښځو د لاس رسي یا له اړمونو ټولنو د ملاتړ مخینوی د دې یو بل ثبوت دی، چې طالبان تر هغه وخته پورې عالي حالت ته رانه شي، تر څو دوی خپله لار بدله کړې نه وي.»
افغانستان کې ملګرو ملتونو هم په یوه اعلامیه کې د طالبانو له لوري پر ښځینه کارکوونکو د محدویتونو د لرې کولو غوښتنه کړې ده.
ملګرو ملتونو لیکلي، د روان میلادی کال د سپټمر په ۷ مه طالب ځواکونو کابل کې د ملګروملتونو دفترونو ته، د دغه بنسټ د ښځينه کارکوونکو د ننووتو مخنیوی وکړ.
د دې بنسټ په وینا، د طالبانو له لوري دغه محدویتونه وروسته د لیکل شویو اعلامیو یا شفاهي ډول په ټولو هېواد کې د ملګرو ملتونو نورو سیمه ییزه دفترو ته هم غځېدلي دي.
د ملګرو ملتونو په اعلامیه کې راغلي، طالب ځواکونه په کابل، هرات او مزار شریف ولایتونو کې د ملګرو ملتونو د دفترونو مخې ته ولاړ دي تر څو د دغه بنسټ دفترونو ته د ښځینه کارکوونکو د ننوتو مخنیوی وکړي.
ملګرو ملتونو ویلي:«دغه موضوع په ځانګړې توګه د افغان ښځو او نجونو پر وړاندې د طالبانو دوامداره محدویتونه د اندېښمنوونکي دي.»
یاد بنسټ دغه راز راوړي، طالبانو کاري ساحو په ځانګړې توګه د هېواد په ختیځ کې زلزله ځپلو ښخو او نجونو ته د مرستو رسولو او په ځانګړې توګه له ایران او پاکستان څخه د راستنو شویو کډوالو عملیاتي سایټونو ته د ښځینه کارکوونکو د ورتګ مخنیوی کړی دی.
افغانستان کې ملګرو ملتونو ویلي، دغه محدویتونه د ملګرو ملتونو سازمان د کارکوونکو د امتیازاتو او خوندیتوب اړوند نړیوالو قوانینو سرغړاوی دی او دوی هڅه کوي، چې دغه محدویتونو ژر تر ژره لرې کړي.
