د افغان مېرمنو د سیاسي ګډون شبکې، د طالبانو له لوري د نجونو پر زده کړو بندیز په تړاو وايي، له زده کړو د نجونو محرومیت هېڅ دیني او کلتوري توجیه نه لري.
رخشانه: د دې اعتراضي غورځنګ غړو تېره ورځ (جمعه د وږي ۲۱ مه) په یوه اعلامیه کې لیکلي، د افغان نجونو پر وړاندې د ښوونځيو دروازې بندول یو ښکاره ظلم دی.
هغوی د ښځو د زده کړو پر وړاندې د طالبانو محدویتونو ته په اشارې وايي، دغه محدویتونه د «بشري حقونو جدي سرغړاوی او د راتلونکي نسل پر وړاندې جنایت دی.»
د معترضو مېرمنو په بیانیه کې راغلي:«هېڅ دیني، کلتوري او سیاسي توجیه نه شي کولی له زده کړو د نجونو محرومیت ته مشروعیت ورکړي.»
د ښځو د سیاسي کډون شبکې د اعتراضي غورځنګ غړو د نجونو پر زده کړو ټينګار کړی او ژر تر ژره یې پرته له قید و شرط څخه د ټولو ښځنیه ښوونځیو د پرانستو غوښتنه کړې ده.
هغوی له نړیوالې ټولنې او د بشري حقونو له ټولو مدافع بنسټونو غوښتي، چې پر طالبانو باید جدي او عملي فشارونه راوړي، تر څو دغه ډله د نجونو پر مخ د ښوونځیو دروازې پرانیزي.
له ۱۴۵۰ زیاتې ورځې کېږي، چې له شپږم ټولګي پورته نجونو پر مخ د ښوونځیو دروازې تړل شوې دي.
سره له دې، چې د بشري حقونو بنسټونو، ملګرو ملتونو او معترضو مېرمنو په وار وار د نجونو د زده کړو پر وړاندې د طالبانو د محدویتونو د لرې کولو غوښتنه کړې، خو دغې ډلې تر اوسه دغه محدویتونه نه دي لرې کړي.
