ننګرهار کې سیمه ییز طالب چارواکي وايي، د دې ولایت چپرهار ولسوالۍ کې د استوګنې یوه کور د چت لوېدو له امله، دوه ماشومانو ژوند له لاسه ورکړی او اووه تنه نور ټپیان شوي دي.
رخشانه: ننګرهار کې د طالبانو د امنیه قوماندانۍ ویاند سید طیب حماد ویلي، دغه پېښه پرون (جمعه د وږي ۲۱ مه) مازیګر مهال په «هدیاخېل» سیمه کې رامنځ ته شوې ده.
د هغه په وینا، د کور چت د دېوالونو د ورستېدو له امله رالوېدلی، چې په پایله کې یې دوه ماشومانو ژوند بایللی او د کورنۍ اووه نور غړي ټپیان شوي دي.
ننګرهار کې د طالبانو د امنیه قوماندانۍ ویاند وايي، د پېښې ټپيان د درملنې په موخه روغتون ته لېږدول شوي دی.
هغه د دې پېښې د ټپیانو د روغتیايي حالت، هویت، عمر او جنسیت په اړه څه نه دي ویلي.
له دې وړاندې هم د هېواد په یو شمېر ولایتونو کې د ورته پېښو له امله څو تنو په ځانګړې توګه ښځو او ماشومانو ژوند له لاسه ورکړی وو.
