د بلخ مرکز مزارشریف ښار کې سیمه ییزې سرچینې وايي، د طالبانو ډلې په دغه ولایت کې وای فای انټرنټ ته د خلکو په لاس رسي پراخ محدویتونه لګولي دي.
رخشانه: مزارشریف ښار کې لږ تر لږه شپږو سرچینو رخشانې رسنۍ ته ویلي، دغه محدویتونه نن (شنبې د وږي ۲۴ مه) د بلخ د والي محمد یوسف وفا له خوا لګول شوی دی.
بلخ ولایت کې د طالبانو والي امر کړی چې:«ټول هغه شرکتونه چې د کېبل او وای فای له لارې کورونو ته انټرنټي خدمات وړاندې کوي، انټرنټ ته دې د خلکو لاسرسی پرې کړي.»
د رخشانې رسنۍ سرچینې تایید کړې، چې د طالبانو د والي له امر وروسته د نن ماښام راهیسې په مزارشریف ښار کې وای فای انټرنټ پرې شوی دی.
د طالبانو د والي دغه امر د مزارشریف د ښاري خلکو لپاره چې د کار، زده کړو او اړیکو لپاره انټرنټ کاروي، د پراخې اندېښنې لامل شوی دي.
یوې سرچینې د هویت پټ ساتلو سره رخشانې رسنۍ ته ویلي، د طالبانو له لوري د نجونو پر مخ د پوهنتونو دروازو تر تړل کېدو وروسته، کابو یو کال وړاندې یې په یوه پوهنتون کې انلاین نوم لیکنه وکړه تر څو خپل تحصیل ته دوام ورکړي.
هغه زیاته کړې، چې د طالبانو له لوري وای فای انټرنټ ته د خلکو په لاسرسي محدویت ډېری وګړي له سختو ستونزو سره مخ کړي دي.
تر اوسه د طالبانو د دغه کار هدف روښانه شوی نه دی.
بلخ کې سیمه ییزه طالب چارواکو هم تر اوسه په دې اړه څه نه دي ویلي.
