ننګرهار کې سیمه ییز طالب چارواکي وايي، د دې ولایت په سرخرود ولسوالۍ کې یوې ځوانې ښځې ځان وژلی دی.
رخشانه: ننګرهار کې د طالبانو د امنیه قوماندانۍ ویاند سید طیب حماد په یوه خبرپاڼه کې ویلي، دغې ښځې تېره ورځ(دوشنبې د وږي ۲۴ مه) ځان وژنه کړې ده.
د طالبانو د امینه قوماندانۍ ویاند وايي، یادې ښځې ۲۶ کاله عمر درلود.
حماد د دغې ښځې د هویت او مدني حالت په اړه څه نه دي ویلي.
دغې ښځې له پړي په کار اخیستنې ځان په یوه کوټه کې راځړولی او خپل ژوند ته یې د پای ټکی ایښی دی.
د ځان وژنې اصلي لامل کورنی تاوتریخوالی ښودل شوی دی.
په ورته وخت ننګرهار کې سرچینو رخشانې رسنۍ ته وايي، دغه ځوانه ښځه د خوګیاڼو ولسوالۍ اصلي اوسېدونکې وه.
د سرچینې په وینا دې ځوانې مېرمنې شپږ میاشتې وړاندې واده کړی وو.
د سرچینې په خبره، د دې ښځې جسد د لا زیاتو څېړنو لپاره د ننګرهار حوزوي روغتون ته لېږدول شوی دی.
د رخشانې رسنۍ سرچینې زیاته کړې، د دغې ښځې کورنۍ اقتصادي ستونزې هم درلودې.
