د ملګرو ملتونو سرمنشي آنتونیو ګوترش په خپل تازه راپور کې ویلي، په می میاشت کې د کابل ښار له بېلا بېلو سیمو لږ تر لږه ۶۰ ښځې او ځوانې نجونې، د طالبانو د خوښې وړ حجاب نه مراعتولو له امله، د دغې ډلې له خوا نیول شوې دي.
رخشانه: دغه راپور چې د ۲۰۲۵ میلادي کال د مۍ له اولې د جولای تر ۳۱ مې مودې پورې چمتو شوی، نن (چهارشنبې د وږي ۲۶ مه) خپور شوی دی.
راپور کې راغلي، طالبانو په دې موده کې ۴۷ نارینه او ۱۶ ښخې په یو شمېر ولایتونو کې د بېلا بېلو تورونو له امله په عام محضر کې په دورو وهلي دي.
د ملګرو ملتونو سرمشني په خپل راپور کې لیکلي، طالبانو د ښځو پر وړاندې د نورو محدویتونو سربېره، په هېواد کې د ښځینه سینګارتونونو تړلو ته هم دوام ورکړی دی.
هغه د طالبانو له لوري د ښځینه سینګارتونونو تړل، د دغې ډلې د امربالمعروف د قانون لا سخت ګامونه بللې دي.
د راپور پر بنسټ، طالبانو د ښځو د جامو اړوند د لارښوونو پلي کول هم سخت کړي او په هرات کې یې پر ښخو چادري اغوستل اجباري کړي دي.
دغه راز په راپور کې راغلي، په تېرو دریو میاشتو کې د امنیت او خوندیتوب ۶۸۷ پېښې افغانستان کې ثبت شوې، چې دا شمېر د تېر ۲۰۲۴ کال، د ورته مودې په پرتله ۹ سلنه زیاتوالی ښيي.
د ملګرو ملتونو سرمنشي زیاته کړې، په دغه موده کې ۵۷ امنیتي پېښې، چې نېغ په نېغ د ملګرو ملتونو په کارکوونکي اغېز کړی هم ثبت شوې دي.
هغه ویلي، د روان میلادي کال په می میاشت کې د ملګرو ملتونو اړوند لسګونه کارکوونکي له دغه سازمان سره د کار له امله، د ناپېژانده کسانو له خوا په مرګ ګواښل شوي دي.
دغه راز د ملګرو ملتونو سرمنشي دا هم وايي، چې په دغه موده کې په هېواد کې ۱۰ تنه غیر نظامي وګړي، د ناچاودو توکو په چاودنو کې وژل شوي او د ماشومانو په ګډون ۵۱ تنه نور ټپيان شوي دي.
دغه راز هغه زیاته کړې، د روان میلادي کال د مي له اولې تر جولای میاشتې پورې، د مخکني نظام د نظامیانو او کارکوونکو د وژنې پنځه پېښې، د خپل سرو نیونو یوه پېښه او د ربړونې او بد چلند درې پېښې ثبت شوې دي.
