د افغانستان لپاره د ملګرو ملتونو د سرمنشي ځانګړې استازې او د یوناما مشره وايي، له زده کړو د نجونو محرومت د افغانستان لپاره لوړه او درنده بیه لري.
رخشانه: اوتانبایوا د خپل ماموریت په پای او خپل وروستي راپور کې نن (چهارشنبې د وږي ۲۶ مه) د ملګرو ملتونو امنیت شورا ته ویلي، له شپږم ټولګې د پورته نجونو د ښوونځیو تړلو، یو نسل له جدي ګواښ او له منځه وړلو سره مخ کړی دی.
هغې د طالبانو له لوري د شپږم ټولګي پورته نجونو پر زده کړو محدویت ته په اشارې ویلي، دغه محدویت د افغان ټولنې تر منځ د لویې اندېښنې او ناهیلۍ لامل شوی دی.
اوتانبایوا وايي، د ملګرو ملتونو د ښځو څانګې د ارزونې له مخې، د افغانستان اکثریت وګړي د نجونو د زده کړو له مخنیوي سره مخالف دي.
هغې زیاته کړې، نړیوال بانک اټکل کړی، چې له شپږم ټولګي پورته نجونو پر زده کړو د طالبانو محدویتونه، هر کال د هېواد د اقتصاد لپاره ۱.۴ میلیون ډالره بیه لري.
د اوتانبایوا د خبرو پر بنسټ افغانستان کې پراخې جګړې او تاوتریخوالی د پام وړ کم شوی، خو د فراطي ډلو شتون، بشري او اقتصادي بېوزلي او د بشري حقونو په اړه اندېښنې لا هم پر ځای پاتې دي.
د افغانستان لپاره د ملګرو ملتونو د سرمنشي ځانګړې اعلان کړی، چې د ۲۰۲۱ کال په اګست کې د طالبانو له لوري عمومي عفوه رغنده وه، خو یوناما د طالبانو له لوري د هغې څخه سرغړاوي مستند کړي دي.
دغه راز اوتانبایوا وايي، د نارینه وو، ښځو، نجونو او لږکیو پر وړاندې د طالبانو د امربالمعروف ځواکونو له خوا مخ پر زیاتېدونکي محدویتونه، د خلکو د ناخوښۍ سبب شوي دي.
هغې په ۲۰۲۵ میلادي کال کې د ۵۰ سلنه مرستو کمېدا، د طالبانو د ښځو ضد سیاستونو زېږنده بللې وايي، د دغې ستونزې تر څنګ وچکالي او طبیعي پېښې هم د هېواد لپاره جدي ګواښ دی.
اوتانبایوا له ګاوندیو هېوادونو د کابو دوه میلیونه کډوالو ایستو ته په اشارې وايي، دغې ستنېدا د نړیوالو سرچینو د کمښت تر څنګ، یو اضافي فشار رامنځ ته کړی دی.
د یوناما مشرې په ملګرو ملتونو پورې تړلو بنسټونو کې د ښځو د کار مخنیوي ته په اشارې ویلي چې«دغه جدي محدویت د اړتیا پر مهال له خلکو سره د مرستې په پار د ملګرو ملتونو توان کمزوری کوي.»
هغه وایي، څو ورځې وړاندې یې د هېواد په ختیځ کې له زلزله ځپلو لیدنه وکړه او په مرستندویه بنسټونو کې د ښځو د کار د مخنیوي امله، د دې طبیعي پېښې زیانمنو ته د خدماتو وړاندې کول ګډوډ کړي دي.
هغې د خپل راپور په پای کې ټینګار کړی، چې اکثریت افغان وګړي له خپل هېواد سره د نړیوالې تولنې د تعامل غوښتونکي دي.
اوتانبایوا هیله څرګنده کړې تر څو«د دې تعامل لپاره یوه لار پیدا شي، تر څو لا زیاتې مثبتې پایلې، په ځانګړې توګه د افغان ښځو او نجونو لپاره رامنځ ته کړي.»
