د افغانستان د ځواکمنو ښځو اعتراضي غورځنګ د طالبانو له لوري د نوري فایبر او وای فای انټرنېټ بندلو په تړاو وايي، دغه ډله هېواد په خاموشه زندان بدلوي.
رخشانه: د دې اعتراضي غورخنګ غړو نن (پنشنبې د وږي ۲۷ مه) په یوه بیانیه کې ویلي، طالبان د انټرنېت په پرې کولو سره د افغانستان خلک اطلاعاتو، آزاده اړیکو له لاسرسي او نړیوال ډګر کې له شتون څخه بې برخې کړي دي.
د افغانستان د ځواکمنو ښځو د اعتراضي غورځنګ غړو په بیانیه کې راغلي، د طالبانو له دې محدویتونو تر ټولو زیات زیان ښځې وینې، ځکه له نړۍ سره د هغوی د اړیکو ټینګولو، د زده کړو توکي، پوهې او مدني مقاومت یوازې کړکۍ همدا انټرنېت دی.
هغوی د طالبانو له خوا د انټرنېټ پرې کول د «د طالبانو د یوې پراخې پروژې یوه برخه بللې، چې غواړي افغان ټولنه منزوي کړي، د ښځو غږونه غلي کړي او د دوی د جرمونو د بربنډولو مخه ونیسي.»
معترضو مېرمنو ویلي، د انټرنېټ پرې کول د افغان وکړو د اساسي حقونو څخه ښکاره سرغړاوی دی او طالبان باید د دې غیر قانوني عمل ځواب و وايي.
هغوی له نړیوالې ټولنې، بشري حقونو له بنسټونو او د بیان د آزادۍ له مدافعینو غوښتي، چې د طالبانو د دې اقدام پر وړاندې دریځ ونیسي او انټرنېت ته د خلکو د لاسرسي په موخه په دې ډلې فشار راوړي.
د افغانستان د ځواکمنو ښځو اعتراضي غورځنګ غړو دغه راز له رسنیو غوښتي تر څو ښخو غږ د دې سیستماتیک سانسور پر وړاندې پورته کړي او اجازه ورنه کړي، چې طالبان هېواد په خاموش زندان بدل کړي.
دوی له ټولو وګړو په ځانګړې توګه له ښځو او ځوانانو غوښتي، چې د طالبانو د دې محدویت پر وړاندې غلي نه شي او د خپل اعتراض او مقاومت غږ ژوندی وساتي.
معترضو مېرمنو له ایلان ماسک غوښتي، چې « فضايي انټرنټ چې د طالبانو له کنټرول او لاسرسي بهر وي د افغانستان د خلکو په واک کې ورکړي، تر څو ښځې او نجونې وکولی شي، د انلاین زده کړو له فرصتونو ګټه واخلي.»
د طالبانو مشر په ټول هېواد کې د نوري فایبر او وای فای انټرنېت د بندېدو امر کړی دي. د دې امر په ترڅ کې تر اوسه په ۱۲ ولایتونو کې انټرنېټ ته د خلکو لاسرسی پرې شوی دی.
