لغمان کې سیمه ییزه سرچینې وايي، دې ولایت په مرکز مهترلام ښار کې، یو سړي خپله مېرمن په ډزو وژلې ده.
رخشانه: مهترلام ښار کې څلورو سرچینو رخشانې رسنۍ ته ویلي، دغه پېښه تېره شپه (جمعه د وږي ۲۸ مه) د ښار«میدانیو» سیمه کې رامنځ ته شوې ده.
د سرچینې په وینا، دغه سړي لومړی خپله مېرمنه وهلې او وروسته یې د کلاشنیکوف په ډزو وژلې ده.
د رخشانې رسنۍ سرچینې زیاته کړې، د دغې ښځې خاوند په نشه يي توکو روږدی وو او ښځه یې د کورني تاوتریخوالي له امله وژل شوې ده.
د سرچینې د خبرو پر بنسټ، د دې ښځې خاوند د خپلې ښځې تر وژلو وروسته له سیمې تېښته کړې ده.
د دغې ښځې هویت او عمر معلوم نه دی او دا هم جوته نه ده، چې اولاد یې درلود که نه.
په ورته وخت د لغمان مرکز مهترلام کې د طالبانو له منځه یوې سرچینې ویلي، د دوی امنیتي ځواکونه هڅه کوي، چې په وژنې تورن کس ونیسي.
پر هېواد د طالبانو له بیا واکمنېدو سره جنايي او د ځان وژنې پېښې، په ځانګړې توګه د ځوانانو تر منځ د هېواد په یو شمېر ولایتونو کې بې مخینې زیاتې شوې دي.
ډېری دغه ډول پېښې د کورني تاوتریخوالي، بېوزلۍ، بې کارۍ او طالبانو د ټولنیزو محدویتونو له امله رامنځ ته کېږي.
