د طالبانو د پوهنې وزارت اعلان کړی، چې له لومړي تر دولسم ټولګي پورې یې د ښوونځي له کتابونو ۵۱ درسي عنوانونه لرې کړي دي.
رخشانه: دا پرېکړه تازه د طالبانو د پوهنې وزارت له خوا شوې او دغه عنوانونه له دري، پښتو، ټولنیزو علومو او انګلیسي څخه لرې او لوستل یې په ښوونځیو کې بند شوي دي.
په هغه مکتوب کې، چې رخشانۍ رسنۍ ترلاسه کړی، راغلي، دغه درسونه د «دیني تعلیماتو، اسلامي امارت د پالیسۍ او زده کړو د معیارونو» خلاف وو.
«بیرغ، د ښوونکي ورځ، مور، ټولنه کې د ښځې حقونه، بشري حقونه، بشردوستي، ګل سرخ میله، د بامیانو مجسمې، رسم، ولسي سندرې، د حضرت علي خلافت» او څو نور هغه درسي عنوانونه دي، چې له دري او پښتو مضمونو لرې کړای شوی دي.
د طالبانو د پوهنې وزارت دغه راز ویلي، د ښونځي ساینسي مضمونونه هم څېړي تر څو که د «دیني تعلیماتو، اسلامي امارت د پالیسۍ او زده کړو د معیارونو» خلاف څه په کې پیدا شي، چې ترې لرې يې کړي.
د طالبانو د پوهنې وزارت له دې مخکې هم څو ځلې، د ابتدایه ښوونځي په درسي مضمونونو کې د عنوانونو د بدلون، لرې کولو او نورو ځای پر ځای کولو خبر ورکړی وو.
دغه راز یادې ډلې ګڼ شمېر سیاسي، مذهبي او تاریخي کتابونه له کتاب پلورنځیو او کتابتونونو راټول او ضبط کړي او د هغو پېر او پلور یې منع کړی دی.
د زده کړو فعالان باوري دي، چې طالبان د ښوونځیو له کتابونو د عنوانونو په لرې کولو او نصاب په بدلون سره هڅه کوي، خپله ایډیولوژي پر زده کونکو پلې کړي.
