د رواداري بشري حقونو بنسټ اعلان وکړ، چې د بشري حقونو له درې نورو بنسټونو سره په همکارۍ یې، د افغان ښځو لپاره د ولسي محکمې د وتلو قاضیانو وروستي نوملړ مشخص کړی دی.
رخشانه: د دغه قاضیانو نوملړ نن (سه شنبه د تلې اوله) مشخص کړای شوی او هغوی به د افغان ښځو لپاره د ولسي محکمې د ناستو، چې د روان میلادي کال د اکتوبر له اتمې تر لسمې پورې د اسپانیا په مادرید ښار کې تر سره کېږي، مسوولیت په غاړه ولري.
دغه ناستې د روادارۍ بشري حقونو بنسټ، د افغانستان د بشري حقونواو دموکراسۍ موسسې، د څېړنو او پراختیا بنسټ او بشري حقونو د مدافع ټولنې په همکارۍ جوړېږي.
د رواداري د بشري حقونو بنسټ ویلي، د افغان ښځو لپاره ولسي محکمه به د «څارنوالانو د بیانونو د ارزونې، د ښځینه قربانیانو د کیسو او متخصیصینو له خوا د چمتو شویو لاسوندونو په کتنې سره د نړیوالو قوانینو د اصولو او معیارانو په چوکاټ کې د طالبانو د جنسیت پر بنسټ د ربړونې سیستم ارزونه وکړي.»
په اعلامیه کې راغلي، دغه بنسټونه به د بشري حقونو د سیستماتیک سرغړاوی د مستندولو او بربنډولو، د قربانیانو د غږ پیاوړي کولو او عدالت او حساب ورکولو په پار د نړیوال پیوستون د رامنځ ته کولو لپاره یو حیاتي بستر رامنځ ته کړي.
د بشري حقونو بنسټونو ویلي، چې د دې محکمې قاضیان به د نړۍ له ګوټ ګوټه د وتلو حقوق پوهانو، پوهنتونیانو او بشري حقونو د مدافعانو څخه وي.
د دې قضايي پلاوي په جوړښت کې به چې نوملړ یې خپور شوی، له افغانستان، اسپانیا، مصر، امریکا، ایټالیا، جنوبي افریقا او هندوستان هېوادونو څخه کسان شتون ولري.
رواداري بنسټ ویلي، د دې قاضیانو سربېره به د افغان څارنوالانو یوه ډله، د نړیوال حقونو په چوکاټ کې، د جنسیت پر بنسټ د ربړونې حقوقي شننه وړاندې کړي.
د بشري حقونو دې بنسټ ټینګار کړیو چې «د افغان ښځو څرګندونې نباید د تړلو دروازو تر شاه پاتې شي، بلکې باید نړیوالې عمومي عرصې ته لار ومومي، د هېرېدو پر وړاندې مقاومت وشي، عدالت غوښتنه وشي او یووالی رامنځ ته شي.»
د رواداري د بشري حقونو بنسټ د روان لمریز کال د زمري میاشتې په لومړیو کې اعلان وکړ، چې د بشري حقونو د درې نورو بنسټونو سره په همکارۍ یې، د افغان ښځو لپاره لومړنۍ ولسي محکمه، د خلکو د دایمي محکمې پر وړاندې پیل کړې ده.
11:07 AM
