هرات ښار کې سرچینو رخشانې رسنۍ ته تایید کړه، چې «د طالبانو استېناف محکمې په یوه علني جلسه کې» یوه ښځه په ډزو وژل شوې ده.
رخشانه: هرات ښار کې دریو سرچینو رخشانې رسنۍ ته تایید کړه، چې دغه ښځه نن «شنبې د تلې ۵ مه» غرمه مهال ۱۰:۳۰ وژل شوې ده.
سرچینې د دې ښخې د شخصي معلوماتو په اړه له څه ویلو ډډه وکړه وايي، دا د هرات د ولایتي شورا د پخواني غړي عبدالرحمان مرادي علي زايي مېرمن وه، چې ټاکل شوې وه، د مېړه د وژنې په تور نن محکمه شي.
یوې سرچینې د هویت خوندي ساتلو سره رخشانې رسنۍ ته ویلي، دغه ښځه له زندان څخه د محکمې علني ته د لېږدولو پر مهال د خاوند له ورور سره له لفظي شخړې وروسته په ډوزو وژل شوې ده.
یوې بلې سرچینې هم دغه پېښه تایید کړې، وايي، د عبدالرحمان مرادي علي زايي پلار هم د محکمې د جلسې پر مهال ټپي شوی او د درملنې لپاره روغتون ته لېږدول شوی دی.
تر اوسه پورې د هغه د روغتیايي حالت په اړه معلومات په لاس کې نشته.
په ورته وخت یو عیني شاهد هم رخشانې رسنۍ ته ویلي، د طالبانو د استېناف محکمې د ننه د شورماشو له پورته کېدو وروسته، د دغې ډلې غړو یو سړی «ولچک کړی» وو او له محکمې یې راوایستل.
د سرچینې په وینا، د دې سړي تر نیولو وروسته، یو کس چې جامې یې پر وینو وې هم د استېناف محکمې له دننه بېرون را وایستل شو.
هغه د طالب ځواکونو له قوله وايي، نیول شوی کس د دعوې یو اړخ وو او د محکمې د جلسې پر مهال یې په وژنې تورن کس باندې ډزې وکړې.
سرچینې د ټپي او نیول شوي کسانو د هویت په اړه بې خبري وښوده.
د هرات د ولایتي شورا پخوانی غړی عبدالرجمان مرادي علي زايي د تېر کال د مرغومي په ۲۱ مه په هرات ښار په خپل کور کې وژل شوی وو.
تر اوسه هرات کې طالب چارواکو په دې اړه څه نه دي ویلي.
