د افغانستان له رسنیو د ملاتړ سازمان (AMSO) وايي، د طالبانو محدودیتونو د رسنیو مسکلي فعالیت سخت او په ټولنه کې یې د اطلاع رسولو کیفیت راکم کړی دی.
رخشانه: یاد بنسټ نن (یکشنبې د تلې ۶ مه) اطلاعاتو ته د لاسرسي نړیوالې ورځ په مناسب یوه اعلامیه کې لیکلي، خبریالان او رسنۍ یوازې هغه اطلاعاتو ته لاسرسی لری، چې د طالبانو په ګټه دي.
د رسنیو د ملاتړ بنسټ ویلي، پر رسنیو او رسینزو فعالایتونو د طالبانو محدودیتونو ښځینه خبریالانې له لا زیاتو ستونزو سره مخ کړې او ډېری د هغو «له طالبانو سره د نېغې اړیکې نیولو او د خپلې مسلکي دندې لپاره اطلاعاتو تر لاسه کولو محرومیت څخه شکایت لري.»
دغه بنسټ زیاته کړې: «د ښځو له حقونو د سرغړونو سربېره، د جنسیت محدودیتونو د نظرونو ډول او په رسنیو کې د دوی فعال شتون کم کړی دی.»
د رسنیو د ملاتړ سازمان له «سانسور، خپرنیزو محدودیتونو، د ساه کښو پر انځور محدودیت، د سیاسي ژوندیو خپرونو مخنیوی او د خبریالانو ګواښلو» څخه اندېښنه ښودلې وايي، دغه محدودیتونو د خبریالانو او رسنیو قانوني حقونه تر پښو لاندې کړي او د ځواب ویلو برخه کې یې روڼتیا راکمه کړې ده.
دغه سازمان «اطلاعاتو ته د لاسرسي قانون د بشپړ پلي کولو، له ښځینه او نارینه خبریالانو ملاتړ، د محدودیتونو او سانسور په کمولو» ټينګار کړی او له بنسټونو او نړیوالې ټولنې یې غوښتي، چې د آزادۍ بیان د تضمین او اطلاعاتو ته د برابر لاسرسي په برخو کې هڅې او له افغان خبریالانو ملاتړ وکړي.
د افغانستان د خبریالانو مرکز (AFJC) هم په یوه اعلامیه کې لیکلي، چې طالبانو په تېرو څلورو کلونو کې ۲۲ کړنلارې صادرې کړې، په شدت سره یې د بیان آزادي، د رسنیو خپلواکي او اطلاعاتو ته عمومي لاسرسی محدود کړی دی.
یاد مرکز ویلي، طالبانو د مدني اعتراضونو د پوښښ پر مخینوي، له خپرېدو وړاندې د منځپانګې کنټرول، پراخ سانسور، د نړیوالو شبکو د خپرونو مخینوي باندې سخت محدودیتونه لګولي دي.
د افغانستان د خبریالانو مرکز دغه راز زیاته کړې، په ملي رسنیو، ډرامو او بېلا بېلو ځایونو کې د راپور ورکولو څخه د ښځینه خبریالانو منع کول پر رسنیو د طالبانو نور محدودیتونه دي.
یاد مرکز د هېواد په ۲۱ ولایتونو کې د ساه کښو انځور خپرولو مخنیوي ته په اشارې وايي، دغه محدودیتونه د لسګونه تلوېزیونونو د تړل کېدو لامل شوي دي.
د افغانستان د خبریالانو مرکز وايي، دا مهال په کابل، غزني او پروان ولایتونو کې ۶ خبریالان بندیان دي.
دغه مرکز له طالبانو غوښتي، چې د رسنیو د قانون او اطلاعاتو ته د لاسرسي قانون څخه خلاف کړنلارې دې لغوه کړي او پر رسنیو څار، سانسور، وېرې او ګواښ ته دې د پای ټکی کېږدي.
د افغانستان د خبریالانو مرکز د خبریالانو د نیونې د درېدو غوښتنه کړې وايي، د طالبانو له لوري نوري فایبر او وای فای انټرنېت ته د کاروونکو د لاسرسي محدودیتونه دې هم لغوه کړای شي.
طالبانو په تېرو څلورو کلونو کې پر رسنیو او رسنیزو فعالیتونو د محدودیتونو په لګولو سره د لسګونه رسنیو د تړل کېدو سبب شوي او یو شمېر خبریالان، کارکوونکي او رسنیز فعالان یې نیولي او زنداني کړي دي
