د «یووالي او باور په لور» تر سرلیک لاندې لومړنۍ سیمه ییزې خبرې اترې به د افغان سیاسي او مدني فعالانو په ګډون د پاکستان اسلام آباد ښار کې تر سره شي.
رخشانه: د افغانستان لپاره د ښځو بنسټ (WFA) اعلان کړی، چې دغه دوه ورځنۍ غونډه به سبا (دوشنبې د تلې ۷ مه) پیل او تر بل سبا پورې به دوام وکړي.
د دې ناستې موخه «د افغان شخصیتونو، استازو، ډلو، د ښځو او سړیو په ګډون د افغان مشرانو او د دوی د پاکستاني سیالانو تر منځ د رغنده، ټولګډونه او پر وخت خبرو اترو لپاره د زمینې برابرولو آسانتیا رامنځ ته کول ښودل شوي دي.
د افغانستان د ښځو لپاره بنسټ په اعلامیه کې راغلي، د دې دوه ورځنۍ ناستې ګډونوال به «په ځانګړې توګه د هېواد په راتلونکې، د ولسواکه نظام پر اړتیاوو او ښځو مانا لروونکي ګډون په اړه» یو له بله خبرې اترې وکړي.
د اعلامیې پر بنسټ ټاکل شوې د ناستې په دویمه برخه کې د «افغانستان او پاکستان د استازو تر منځ د دوه اړخیزه همکاریو پیاوړتیا، باورجوړونې او د سیمه ییزه ننګونو لپاره د خلکو پر بنسټ د حل لارې موندلو باندې تمرکز کول وي.»
اعلامیه کې راوړل شوي «په دې کړنلاره کې به هڅه وشي، چې د ثبات لپاره لار هواره کړي، د خلکو د ارادې پر بنسټ د قانون حاکمیت رامنځ، متقابل تفاهم پیاوړی کړی، همغږي ښه کړي او د ګډو اصولو د تعریف له لارې د ښځو حقونو او ګډون ته نوې ژمنې ورکړي.»
د افغانستان د ښځو لپاره بنسټ ویلي، چې دا ناسته د دواړو هېوادونو د خلکو تر منځ د انساني اړیکو د پیاوړتیا او تل پاتې او پراخې سولې ته د رسېدو ګام ګڼل کېږي.
ټاکل شوې وه، دغه ناسته د روان میلادي کال د (اګست له ۲۵-۲۶) د افغان سیاسي او مدني فعالانو په ګډون د پاکستان اسلام آباد ښار کې جوړه شي، خو بلې نېتې ته وځنډول شوه.
د دې ناستې کوربنو ویلي وو، چې د نېټې بدلون د دې سیاسي پېښې لا ژوروالي او ټولیزوالي لپاره فرصت برابروي.
پر هېواد د طالبانو له واکمنۍ څلور کاله وروسته، په لومړي ځل د دې ډلې مخالفین په اسلام آباد کې د دغه غونډې کوربه توب پر غاړه اخلي، خو دغه موضوع له غبرګونونو سره هم مل وه.
د افغان سولې لپاره د امریکا پخواني ځانګړي استازي زلمي خلیلزاد پر پاکستان د دې غونډې د کوربه توب له امله، نیوکه او ادعا یې کړې وه، چې دا پروګرام د پاکستان د استخباراتي سازمان (آی اېس آی) په ملاتړ جوړېږي
