ننګرهار کې سیمه ییزه سرچینې وايي، د دې ولایت مرکز جلال آباد ښار کې یوه ښځه د خپلې خور د خاوند له خوا وژل شوې ده.
رخشانه: د ننګرهار مرکز جلال آباد ښار کې دوه سرچینو رخشانې رسنۍ ته ویلي، دغه ښځه پرون ماښام (جمعه د تلې ۱۱ مه) د ښار د څلورمې ناحیې اړوند سیمه کې وژل شوې ده.
د رخشانې رسنۍ د سرچینو په وینا، دغې ښځې کابو ۲۸ کاله عمر درلود او په ډزو وژل شوې ده.
سرچینو زیاته کړې، د دې ښځې خاوند په یوه اروپايي هېواد کې مهاجر دی او هغې له خپلو دوه زامنو سره یو ځای د خپلې خور د خاوند په کور کې ژوند کاوه.
تر اوسه د دې ښځې د وژنې علت نه دی معلوم.
ننګرهار کې سیمه ییزه طالب چارواکو هم تر اوسه په دې اړه څه نه دي ویلي.
واک ته د طالبانو د بیا رسېدو وروسته، د هېواد په یو شمېر ولایتونو کې د کورنۍ د غړو او خپلوانو له خوا د ښځو او نجونو د وژنو پېښو کې زیاتوالی راغلی دی.
ډېری دغه ډول وژنې د کورني تاوتریخوالي، بېوزلۍ، اقتصادي ستونزو او روحی – رواني ناروغیو له امله رامنځ ته کېږي.
