افغانستان کې د ملګرو ملتونو د ماشومانو د ملاتړ بنسټ (یونیسف) له ګاونډیو هېوادونو د افغان کورنیو او ماشومانو د خوندي او تدریجي راستندېدو غوښتنه وکړه.
رخشانه: افغانستان کې د یونیسف استازي ډاکتر تاج الدین اویوالي نن (یکشنبې د تلې ۱۳ مه) پر خپله اېکس پاڼه د یوه پوسټ په خپرولو سره له ګاونډیو هېوادونو د راستنېدونکو د ملاتړ غوښتنه وکړه.
هغه لیکلي: «له ملاتړ کوونکو بنسټونو غواړو، چې د استوګنې، بیا مېشتېدنې او اساسي خدماتو ته د دوامداره لاسرسي پروسې ملاتړ وکړي، په ځانګړې توګه د بې سرپرسته او کورنیو جلا شویو ماشومانو لپاره.»
یونیسف څه موده مخکې اعلان کړی وو، چې له ایران څخه د افغان کډوالو د ایستلو لړۍ په ترڅ کې، هره ورځ زرګونه ماشومان د هرات د اسلام کلا له لارې هېواد ته راځي، چې بېړنیو مرستو ته اړتیا لري.
د دغه بنسټ استازي ډاکتر تاج الدین اویوالي ویلي وو، چې له ایرانه له راستنو شویو کډوالو یو په څلورمه برخه ماشومان دي.
هغه زیاته کړې وه، له ایرانه راستنو شویو کابو ۵ زره ماشومان «بې سرپرسته» او له کورنیو جلا شوي دي.
د ماشومانو د ژغورنې سازمان هم په یوه راپور کې لیکلي وو، چې د روان کال په جون میاشت کې له ۸۰ زره زیات افغان ماشومان له ایران څخه افغانستان ته راستانه شوي دي.
په راپور کې راغلي وو، چې دغه شمېره د تېرې یوې میاشتې په پرتله دوه برابره شوې، او له دغه ماشومانو کابو شپږ زره او ۷۰۰ تنه یې بې سرپرسته او شاوخوا ۳۹ سلنه یې په زور له ایران څخه را ایستل شوي دي.
له ایران او پاکستان څخه د افغان کډوالو پراخې ایستنې د بشري مرستندویه سازمانونو او بشري حقونو د فعالانو غبرګونونه له ځان سره درلودل، هغوی له دې هېوادونو د کډوالو ایستلو لړۍ د درېدو غوښتنه کړې ده.
