افغانستان کې د بشري حقونو لپاره د ملګرو ملتونو ځانګړي راپور ورکوونکي ریچارډ بنټ، د ملګرو ملتونو د بشري حقونو شورا له خوا د خپل ماموریت د غځونې هرکلي وکړ.
رخشانه: ښاغلي بنټ نن مازیګر (دوشنبې د تلې ۱۴ مه) په خپله اېکس پاڼه د یوه پوسټ په خپرولو سره لیکلي «لېواله یم، چې په افغانستان کې د بشري حقونو پر وضعیت څار او راپور ورکولو ته دوام ورکړم.»
د ملګرو ملتونو د بشري حقونو شورا نن په افغانستان کې د بشري حقونو د سرغړوونکو د څېړلو لپاره، د یوې خپلواکې کړنلارې د تصویب سره هم مهاله، په افغانستان کې د بشري حقونو د ځانګړي راپور ورکوونکي ریچارډ بنټ، د ماموریت غځونې خبر ورکړ او ویې لیکل، چې د هغه فعالیتونه د نوې کړنلارې بشپړونکې دي.
په افغانستان کې د ملګرو ملتونو د بشري حقونو ځانګړي راپور وروکوونکي ویلي، د خپل ماموریت په تر سره کولو کې به د ټولو ښکېلو اړخونو سره کار وکړي، تر څو د بشري حقونو وضعیت ښه کولو لپاره لارې چارې ومومي.
هغه د طالبانو تر واک لاندې افغانستان کې د بشري حقونو د پراخې سرغړونې د څېړولو لپاره، د نوې خپلواکې کړنلارې رامنځ ته کېدل د افغانستان د خلکو لپاره د عدالت تر لاسه کولو په لار کې یوه تاریخي لاس ته راوړنه وبلله.
بنټ ویلي، دا کړنلاره به جدي جرمونه وڅېړي او د راتلونکو قضايي پروسو په اسانه کولو سره به د نړیوالې جنايي محکمې (ICC) بشپړونکې وي.
په افغانستان کې د بشري حقونو په اړه د ملګرو ملتونو ځانګړي راپور ورکوونکي ټینګار کړي، چې د بشري حقونو شورا د طالبانو تر واک لاندې افغانستان کې د پراخو بشري حقونو سرغړونو د څېړلو لپاره د یوې خپلواکې کړنلارې په تصویب سره د «افغان ژوندي پاتې شویو غږونو اورېدلي دي.»
