د بشري حقونو د مدافعانو ټولنې(+HRD) د ملګرو ملتونو د بشري حقونو شورا له خوا په افغانستان کې د بشري حقونو د سرغړونو د څېړنې لپاره د خپلواکې کړنلارې د تصویب هرکلی وکړ.
رخشانه: دغې ټولنې نن (دوشنبې د تلې ۱۴مه) د یوې اعلامیې په خپرولو سره ویلي، دغه پرېکړه قربانیانو، د ورثه وو او افغان مدني ټولنې لپاره یو تاریخي بدلون دیو چې د حقیقت موندنې، عدالت او حساب ورکولو په لور یو ګام ګڼل کېږي.
د بشري حقونو د مدافعانو ټولنې (HRD+) ویلي، دوی له تېرو څو کلونو راهیسې د خپلو داخلي او نړیوالو همکارانو سره په ګډه د بشري حقونو شورا څخه د دې ډول یوې کړنلارې د رامنځ ته کولو غوښتونکي وو.
یادې ټولنې و ویل چې «د بشري حقونو شورا د دې کړنلارې تصویب، د افغانستان د مدني ټولنې همغه پخوانی غوښتنه ده، چې د عدالت، د کړاونو د پټۍ او له مجازاتو خوندیتوب ته د پای ټکی اېښودل وو.»
په اعلامیه کې راغلي، دغه کړنلاره به د بشري حقونو د پراخو سرغړونو، د جنسیت پر بنسټ ځورونې او کړونې، له قضا پرته اعدامونو، ربړونې، د ښځو او نجونو او لږکیو د سیستماتیک ظالمان په ګډون تر سره کوونکي محاکمه کړي.
د بشري حقونو د مدافعانو ټولنې دا پرېکړه د افغانانو په ځانګړې توګه د ښځو، نجونو، لږکیو او د بشري حقونو د مدافعینو د مقاومت د پېژندلو نښه بولي، چې په خپله زړورتیا سره یې د ظلم او چوپتیا په منځ کې د عدالت لپاره هیله ژوندنۍ ساتلې ده.
دې ټولنې د ملګرو ملتونو د سرمنشي او د بشري حقونو د عالي کمېشنرۍ له دفتره غوښتي، چې د دې کړنلارې د عملي کولو پروسه پرته له ځنډه پیل کړي او ډاډ تر لاسه کړي، چې اړینې سرچینې، وړتیا او ملاتړ ورته چمتو کړي.
په افغانستان کې د بشري سرغړونو د څېړلو لپاره خپلواکه کړنلاره نن د ملګرو ملتونو د بشري حقونو شورا له خوا د هېڅ ډول مخالفې رایې پرته تایید شوه.
د بشري حقونو څار ډلې هم په یوه اعلامیه کې اعلان کړی، چې د ملګرو ملتونو د بشري حقونو شورا د ۲۰۲۵ د اکتوبر په ۶ مه یو تاریخي پرېکړه لیک تصویب کړ، چې پر بنسټ یې په افغانستان کې د بشري حقونو د تېرو او روانو سرغړونو د پلټنې لپاره یوه خپلواکه کړنلاره رامنځ ته کېږي.
دا پرېکړه لیک طالبانو او په افغانستان کې د جدي جرمونو نورو ترسره کوونکو ته یو روښانه پیغام لېږي، چې لاسوندونه راټول او چمتو کېږي، تر څو دوی یوه ورځ د عدالت پر وړاندې د خپلو جرمونو ځواب ویونکي شي.
