په هېواد کې پر ټولنیزو شبکو د طالبانو د محدودیتونو پر دوام پلازمېنه کابل او دایکنډي ولایت مرکز نیلي ښار کې سرچینې وايي، طالبانو ټولینزې رسنۍ انسټاګرام ته د کاروونکو لاسرسی محدود کړی دی.
رخشانه: کابل او نیلي ښارونو کې لږ تر لږه درېو سرچینو رخشانې رسنۍ ته ویلي، د نن ورځې له ماسپښین (سه شنبې د تلې ۱۵ مه) انسټاګرام ته لاسرسی نه لري.
د سرچینو په وینا، له فیلټر ماتونکي (وي پي ان) پرته انسټاګرام څخه کار اخیستل امکان نه لري.
د دایکنډي مرکز نیلي ښار کې یوې سرچینې هم رخشانې رسنۍ ته ویلي، د انسټاګرام ټولنیزه شبکه نن له ماسپښین وروسته ډېر «سوکه» کار کوي.
هغه ویلي: «نن ماسپښین مې چې هر څومره هڅه وکړه، چې انسټاګرام ته یو پوسټ پورته کړم، ونه شوه، له څو ځلې هڅو وروسته په پای کې یو مې یو پوسټ پورت ته کړ، خو کیفیت یې خورا ټيټ وو.»
په ورته مهال په کابل کې دوه سرچینو رخشانې رسنۍ ته ویلي، اوونۍ وړاندې د انټرنېت له ۴۸ بندښت وروسته د نېټ سرعت ټیټ شوی دی.
د سرچینې په وینا، دغه محدودیت د دې لامل شوی، تر څو دوی ونه توانېږي په آسانۍ سره سایټونو او «ان خواله رسنیو» ته په سمه توګه لاسرسی ولري.
تر اوسه پورې د طالبانو د مخابراتو وزارت او د دغه ډلې تر کنټرول لاندې اترا ادارې د انسټاګرام پر شبکې د محدودیت لګولو په اړه څه نه دي ویلي.
دغې ډلې له دې وړاندې ټيک ټاک او پاپجي ته د کاروونکو لاسرسی په ټول هېواد کې محدود کړی وو.
د طالبانو مشر د روانې لمریزې میاشتې په لومړیو کې په ټول هېواد کې د نوري فایبر او وای فای انټرنېټ د بندولو امر ورکړی وو.
د دغه امر په ترڅ کې د هېواد په لږ تر لږه ۱۴ ولایتونو کې وای فای او د نوري فایبر انټرنټ پرې شوی دی.
