د ټولنیزو شبکو پر وړاندې د طالبانو د محدودیتونو په دوام، د هېواد په لږ تر لږه ۱۲ ولایتونو کې سرچینو ویلي، طالبانو د فسبوک خواله رسنۍ ته د کاروونکو لاسرسی هم محدود کړی دی.
رخشانه: د سرچینو په وینا، دغه محدودیت د نن سهار (چهارشنبې د تلې ۱۶ مې) راهیسې د هېواد په ۱۲ ولایتونو کې لګول شوی دی.
د سرچینو په خبره، د فسبوک ټولنیزې شبکې کارول په کابل، هرات، قندوز، بلخ، غور، بادغیس، دایکنډي، بامیان، سمنګان، غزني، پروان او بغلان ولایتونو کې له فلټر ماتونکي (وي پي ان) پرته امکان نه لري.
طالبانو تېره ورځ مازیګر مهال په کابل او یو شمېر نورو ولایتونو کې انسټاګرام او سنپ چټ ته هم د کاروونکو لاسرسی محدود کړی وو.
د طالبانو له خوا د تېرې اوونۍ په جریان کې د انټرنېټ د ۴۸ ساعته بندښت وروسته اوس په ټول هېواد کې د انټرنېټ سرعت ټیټ شوی دی.
دغه محدودیتونه د دې لامل شوي، تر څو کاروونکي ونه توانېږي، په آسانه سیایټونو او «ان خواله رسنیو ته» لاسرسی ولري.
تر اوسه پورې د طالبانو د مخابراتو وزارت او د دغه ډلې تر واک لاندې اترا ادارې د فسبوک او انسټاګرام پر ټولنیزو شبکو د محدودیت لګولو په اړه څه نه دي ویلي.
دغې ډلې له دې وړاندې ټیک ټاک او پابجي ته هم په ټول هېواد کې د کاروونکو لاس رسی بند کړی وو.
د طالبانو مشر د روانې لمریزې میاشتې په لومړیو کې، په ټول هېواد کې د نوري فایبر او وای فای انټرنټ د بندولو امر له «منکراتو» د مخنیوي په موخه ورکړی وو.
د دې امر په ترڅ کې د هېواد په لږ تر لږه ۱۴ ولایتونو کې وای فای او د نوري فایبر انټرنېټ پرې شوی دی.
