طالبانو روانه اوونۍ، په کابل، ننګرهار، تخار، غزني، کاپیسا او خوست ولایتونو کې د بېلا بېلو تورونو له امله، د څلورو ښځو په ګډون ۲۴ تنه په عام محضر کې په دورو وهلي دي.
رخشانه: دغه کسان له «کوره د تېښتې، د نشه کوونکو ګولیو او چرسو د پېر، پلور او قاچاق، غلا، لواطت، اخلاقي فساد، نامشروع اړیکې، د شرابو پېر او پلور» په تورونو په دې شپږو ولایتونو کې په دورو وهلي دي.
د یکشنبې په ورځ د (تلې ۱۳ مه) په کابل ښار کې د یوې ښځې په ګډون اته تنه له «کوره د تېښتې، د نشه کوونکو ګولیو او چرسو د پېر، پلور او قاچاق» په تور په دورو وهلي دي.
د یوې ښځې په ګډون دوه تنه له «کوره د تېښتې» په تور په کابل کې ۳۵ دورې وهل شوي دي.
دغه کسانو ته په کابل ښار کې د طالبانو د څلورم زون د ابتدایه محکمې د پرېکړې پر اساس د دوه کاله تنفذي بند سزا هم اورول شوې ده.
شپږ تنه نور بیا د « د نشه کوونکو ګولیو او چرسو د پېر، پلور او قاچاق» په تور په کابل کې له ۱۰ تر ۳۵ دورو وهل شوي دي.
دغه کسان په کابل کې د نشه يي توکو او مسکراتو پر ضد د طالبانو محکمې له خوا په اوه میاشتې او دوه کلونو او شپږ میاشتو تنفذي بند هم محکوم شوي دي.
د دوشنبې په ورځ د (د تلې ۱۵ مه) د ننګرهار ولایت په خوګیاڼو ولسوالۍ کې درې تنه د «لواطت او غلا» په تور د خلکو پر وړاندې ۳۹ دورې وهل شوي او په شپږ میاشتې تنفذي بند محکوم شول.
د چهارشنبې په ورځ د (تلې ۱۶ مه) په تخار، غزني، کاپيسا او خوست کې، د دریو ښځو په ګډون ۱۱ تنه په عام محضر کې په دورو وهل شوي دي.
له دې شمېرې د یوې ښځې په ګډون دوه تنه له «کوره د تېښتې» په تور په تخار ولایت کې ۳۹ دورې وهل شوي، خو معلومه نه ده، چې دغه دوه تنه په څومره بند محکوم شوي دي.
دغه راز یو تن د «اخلاقي فساد» په تور د غزني ولایت په ګیلان ولسوالۍ کې د خلکو پر وړاندې ۲۵ دورهې وهل شوی، خو دا هم نه ده معلومه چې په څومره بند محکوم شوی دی.
د دوه ښځو په ګډون پنځه تنه «د نامشروع اړیکې او لواطت» په تور د کاپیسا ولایت په حصه اول ولسوالۍ کې د خلکو پر وړاندې ۳۹ دورې وهل شوي او له شپږو میاشتو تر یوه کاله په تنفذي بند هم محکوم شوي دي.
درې تنه د «غلا او اخلاقي فساد» په تور د خوست ولایت په باک ولسوالۍ کې د خلکو پر وړاندې له ۲۰ تر ۳۰ دورې وهل شوي او په یوه کال تنفذي بند محکوم شوي دي.
د پنشنبې په ورځ د (د تلې ۱۷ مه) دوه تنه د «شرابو د پېر او پلور» په تور د ننګرهار ولایت مرکز جلال آباد ښار کې د خلکو پر وړاندې ۳۹ دورهې وهل شوي او په دوه کاله تنفذي بند هم محکوم شوي دي.
طالبانو د تېرې اوونۍ په جریان کې د شپږو ښځو په ګډون ۱۶ تنه د بېلا بېلو تورونو له امله په دوه ولایتونو کې په دورو وهلي وو.
