د «سپینې لکڼې» نړیوالې ورځې سره سم، بلخ ولایت کې د ړندو کسانو منځ کې سرچینې وايي، په دې ولایت کې ړندې ښځې د روحي او رواني ناورین سره لاس او ګرېوان دي.
رخشانه: بلخ کې د ړندو ټولنې د غړو تر منځ سرچینې وايي، د سپینې لکڼې نړیواله ورځ نن (چهارشنبې د تلې ۲۳ مه) د ړندو ښځو له حضور پرته په مزارشریف ښار کې ولمانځل شوه.
بلخ کې د ړندو ټولنې مسوول عبدالرحیم صفا ویلي، همدا اوس لږ تر لږه پنځه زره ړانده یا کم لیدونکي کسان په بلخ ولایت کې ژوند کوي.
هغه د کاري فرصتونو نشتوالی، په ښوونځیو کې د ښوونیزو کتابونو کمښت، په کانکور ازموینه کې د ګډون مخنیوی او اقتصادي ستونزې د دغه کسانو پر وړاندې خنډونه وبلل.
بلخ کې د ړندو ټولنې غړي شېر محمد محمدي ویلي، په دې ولایت کې د ړندو نجونو پر مخ د ښوونځیو د تړل کېدو وروسته، د دې ښوونځیو زده کوونکي په روحي او رواني ناروغیو اخته شوي دي.
هغه و ویل: «نورې زده کوونکې نجونې خو د ښوونځیو د دروازو تړلو سره کولی شي له بېلا بېلو لارو له ټولنې سره اړیکه ونیسي، خو د معلولو زده کوونکو نجونو پر وړاندې د ښوونځیو تړلو، له هغوی هیلې اخیستې او پر دې سربېره په روحي – رواني ناروغیو د هغوی اخته کېدل د دوی د منزوي کېدو لامل شوی دی.»
بلخ کې د ړوندو ټولنې یو بل غړي عبدالباسط مولوي زاده ړندو کسانو ته د ځانګړي ښوونکي له نه شتون څخه شکایت وکړ وايي، دغه کسان د زده کړو په برخه کې له ګڼو ستونزو سره مخ دي.
هغه و ویل: «په بلخ کې ړانده یا کم لیدونکي کسان نه شي کولی په کانکور ازموینه کې ګډون وکړي، د دې کسان لپاره د بریل لیک ښوونکی شتون نه لري.»
په ورته وخت په بلخ کې د طالبانو د شهیدانو او معلولینو ریاست وايي، دا مهال ۴۰۰ ړانده کسان د دې بنسټ تر پوښښ لاندې دي او هره میاشت هغوی ته میاشتنۍ تنخوا ورکول کېږي.
د اکتوبر پنځلسمه د ملګرو ملتونو له خوا د ړندو یا سپینې لکڼې نړیواله ورځ نمول شوې ده. دغه ورځ هر کال په یو شمېر هېوادونو کې د دې ډول کسانو د ستونزو پوهاوي لپاره لمانځل کېږي.
