د طالبانو تر واک لاندې د افغانستان ملي راډیو تلوېزیون ویلي، د دې رادیو تلوېزیون خبریال عبدالظاهر صافی، هم پر کابل د پاکستان د تېرې ورځې په بریدونو کې وژل شوی دی.
رخشانه: دغه خبریال کابل کې د راپور چمتو کولو پر مهال وژل شوی دی، د دې خبریال د وژل کېدو په اړه نور جزیات په لاس کې نشته.
تېره ورځ هم پکتیا کې د ملي راډیو تلوېزیون خبریال عبدالغفور عابد، د خوست ولایت پر ځاځي میدان ولسوالۍ د پاکستان په بریدونو کې وژل شوی وو.
پکتیا کې د ملي راډیو د خپرونو مدیر تواب آرمان هم له خپل موټر چلوونکي سره یو ځای په دې جګړه کې ټپي شوی وو.
د افغانستان د خبریالانو مرکز اعلان کړی وو، چې دغه خبریالان د خوندیتوب توکو پرته سیمې ته تللي وو.
یوناما نن سهار اعلان کړی، چې د طالبانو او پاکستان تر منځ وروستیو نښتو کې د ښځو او ماشومانو په ګډون ۱۸ تنه وژل شوي دي.
طالبانو هم تېره ورځ اعلان کړی وو، چې د کندهار ولایت سپین بولدک ولسوالۍ کې د دوی او پاکستاني ځواکونو تر منځ نښتو لږ تر لږه ۱۲ غیرنظامي وګړي وژل شوي او له ۱۰۰ زیات ټپیان دي.
طالبانو پرون مازیګر اعلان وکړ، چې نامعلومې مودې او تر «هغه چې تېری نه وي لیدل شوی» د دې ډلې او پاکستان تر منځ اوربند شوی دی.
د طالبانو او پاکستان ځواکونه د روانې اوونۍ د شنبې په شپه د دواړو هېوادونو تر منځ پوله کې د څو ساعتونو لپاره سره ونښتل. د دې نښتو په پایله کې د دواړو هېوادونو تر منځ پولې له تېرو څو ورځو راهیسې تړل شوې دي.
