د افغانستان د خبریالانو مرکز (AFJC) اعلان کړی، چې طالبانو د شمشاد خصوصي رادیو تلوېزیون خپرونې بندې کړې دي.
رخشانه: دغه مرکز نن سهار (شنبې د تلې ۲۶ مه) د یوې اعلامیې په خپرولو سره ویلي، د دې رسنۍ خپرونې له پرون مازیګر راهیسې د طالبانو د استخباراتي ادارې «د مستقیم امر پر اساس» بندې شوې دي.
په اعلامیه کې راوړل شوي: «شمشاد تلوېزیون تورن شوی، چې د طالبانو او پاکستان وروستۍ جګړه او پر افغانستان د پاکستان بریدونه یې په سمه توګه نه دي پوښلي او دغه راز یې د پاکستان پر وړاندې د طالبانو له غبرګون او اقداماتو هم دفاع نه ده کړې.»
په ورته وخت د افغانستان د رسنیو د ملاتړ سازمان (AMSO) هم په یوه اعلامیه کې د شمشاد خصوصي رسنۍ د خپرونو د بندېدو خبر ورکړی دی.
دغه سازمان ویلي چې «د طالبانو تبلیغاتي ټیم د شمشاد رادیو تلوېزیون له مسوولینو سره اړیکه نیولې او ورته ویلي یې دي، چې دغه پرېکړه د کندهار له خوا شوې ده.»
تر اوسه د دې خصوصي رسنۍ او د طالبانو د اطلاعاتو او کلتور وزارت چارواکو په دې اړه څه نه دي ویلي.
د افغانستان د خبریالانو مرکز او د افغانستان د رسنیو د ملاتړ سازمان د طالبانو دغه اقدام «د یوې رسنۍ په چارو کې ښکاره لاسوهنه» بللې او هغه یې غندلی دی.
دغه دوه بنسټونو له طالبانو غوښتي، چې د شمشاد رادیو تلوېزیون د خپرونو بندېدو امر لغوه کړي او د «رسنیو د ځپلې او ګواښلو» پر ځای دې له دې رسنیو ملاتړ وکړي.
طالب ډلې د خپلې څلور کلنې واکمنۍ په موده کې، د پراخو محدودیتونو په لګولو او د رسنیو په تړلو، د خبریالانو په نیولو او ګواښلو سره د هېواد رسینزه فضا په شدت سره محدوده کړې ده.
