هرات ولایت کې سیمه ییزه سرچینې وايي، د طالبانو د امربالمعروف ځواکونو د ښار په ۶۴ واټ کې «جمعه بازار» ته د ښځو په ننوتو بندیز لګولی دی.
رخشانه: هرات ښار کې لږ تر لږه دوه سرچینو رخشانې رسنۍ ته ویلي، دا محدودیت له تېرو دوه اونیو راهیسې لګول شوی دی.
د سرچینو په وینا، طالبانو د «ښځو تر منځ د بې بندباره نارینه د شتون» په دلیل د ۶۴ متره په بازار کې د هغوی په تګ راتګ بندیز لګولی دی.
سرجینو زیاته کړې، د طالبانو دا پرېکړه د دې لامل شوې، تر څو یو شمېر مېرمنې، چې د پلورنې یا تفریح لپاره د جمعې په ورځ دغه بازار ته ورتللې، له تګ راتګ څخه پاتې شي.
یوې سرچینې ویلي، هره اوونۍ به له خپلې مور او خور سره د اړتیا وړ توکو د پېرلو لپاره دې بازار ته تله، خو تر اوسه یې «غیراخلاقي یا غیر اسلامي» څه په دې بازار کې نه دي لیدلي.
هغې د طالبانو دا پرېکړه «له ټولنې د ښځو د لرې کولو سیاست» یوه برخه وبلله ویې ویل: «دغه [طالبان] وايي، چې د ښځو شتون د فساد لامل کېږي، خو ولې په دې بازار کې د نارینه وو مخنیوی نه کوي؟ طالبان ولې یوازې په ښځو ظلم کوي؟»
په هرات ښار کې یوې بلې سرچینې هم ویلي، د مخکې جمعې په ورځ هم د پېرنې لپاره په ۶۴ متره سړک کې جمعه بازار ته تللې وه، خو د طالبانو د امربالمعروف ځواکونو د ګڼې ګوڼې له امله یې ان «جرات» ونه کړل، چې له موټره هم ښکته شي.
هغې زیاته کړې: «طالبانو د لیلام ټولې هټۍ تړلې وې او هېڅ یوې ښځې حق نه درلود، چې [له هغې ځایه] تېرې شي.»
هرات ښار کې د ۶۴ متره بازار په دې وروستیو کلونو کې د ښځو لپاره د کور توکو، جامو او دویم لاس شیانو په ټیټه بیه اخیستو په ځای بدل شوی دی، په ځانګړې توګه د دې ځای په جمعه بازار کې هره اوونۍ لاسي توکي پلورونکي خپل شیان د پلور لپاره وړاندې کوي او په کې د جامو، کور د توکو او سړک د سر خوړو د اخیستو لپاره د ښځو ګنه ګوڼه زیاته وي.
هرات کې د طالبانو د امربالمعروف ځواکونو د سږ کال په پسرلي کې هم د ښار«د لیلامیو په واټ، د کوټ اغوستونکو ښځو د تګ راتګ» مخنیوی کړی وو.
