د افغانستان لپاره د برېتانیا ځانګړي استازي ریچارډ لیندسي کابل ته د خپل سفر پر مهال له طالبانو غوښتي، چې پر خلکو انټرنېټ بند نه کړي.
رخشانه: د برېتانیا د بهرنیو چارو وزارت په یوه خبرپاڼه کې اعلان کړی، چې د افغانستان په چارو کې د برېتانیا ځانګړي استازي ریچارډ لیندسي په اکتوبر میاشت کې افغانستان ته سفر کړی دی.
په اعلامیه کې راغلي، د دې سفر په ترڅ کې هغه د طالبانو له وزیرانو او چارواکو سره کتلي دي.
ښاغلي لیندسي په دې سفر کې د بېلا بېلو موضوعاتو په اړه له هغې ډلې په سیمه ییز ثبات، بشري مرستو، انټرنېټ ته په لاسرسي او د ښځو او نجونو د حقونو په اړه خبرې کړې دي.
نوموړي ویلي: «دا سفر یو فرصت و تر څو د طالبانو له وزیرانو او چارواکو سره د مهمو موضوعاتو په اړه رغنده خبرې اترې وکړم. برېتانیا د افغانستان د خلکو ملاتړ ته لا هم ژمنه ده او سږ کال یې ۴ میلیونه پونډ بېړنیو مرستو او تر ۱۵۱ میلیون پونډ بشردوستانه ملاتړ ته ځانګړې کړې دي.»
ځانګړي استازي دغه راز د انټرنېټ پرېکېدو پر اغېزو، چې د خلکو په حیاتي خدماتو د ګډوډۍ او د خلکو د انزوا لامل شوی، له طالبانو سره خبرې کړې او د دې ډلې له چارواکو یې وغوښتل، چې انټرنېټ ته لاسرسی خوندي کړي.
په اعلامیه کې راغلي، نوموړي د ښځو او نجونو او قومي او مذهبي لږکیو د حقونو په اړه خپره اندېښنه څرګنده کړې او د ملګرو ملتونو په مشرۍ یې د دوحې پروسه کې د پراخ بنسټ او ټولګډونه حکومت په جوړېدو ټینګار کړی دی.
د سیمې ثبات هم د خبرو اترو یو له اصلي محور څخه وو. ښاغلي لیندسي له طالب چارواکو وغوښتل، چې له پاکستان سره خبرو اترو ته، د تاوتریخوالي د کمولو او تل پاتې حل لارې موندنې په موخه دوام ورکړي.
همدارنګه د برېتانیا ځانګړي استازي د افغانستان د مدني ټولنې له مشرانو له هغې ډلې د ښځو سازمانونو له استازو سره لیدنه کړې، تر څو له نېږدې تر اوسنیو محدودیتونو لاندې ژوند او د بشردوستانه مرستو په وړاندې کولو کې د ښځو د رول په اړه د هغوی نظرونه واوري.
