په افغانستان کې د ملګرو ملتونو سیاسي استازولۍ (یوناما) په یوه راپور کې اعلان کړی، چې طالبانو د اګست میاشتې په وروستیو کې، په ځینو ولایتونو کې د نجونو پر مخ د دیني مدرسو دروازې هم تړلې دي.
رخشانه: دغه راپور په افغانستان کې د بشري حقونو وضعیت د روان میلادي کال د جولای تر سپټمبر میاشتې پورې ارزولی او نن (سه شنبې د لړم ۶ مه) خپور شوی دی.
یوناما په خپل راپور کې لیکلي، طالبانو په کابل کې درې دیني مدرسې د «حجاب له قوانینو په سرغړونې، د ښوونځي کتابونو تدریس او له شپږم ټولګي پورته نجونو د نیولو» له امله تړلې دي.
د ملګرو ملتونو سیاسي استازولۍ دغه راز اعلان کړی، چې طالبانو د اګست میاشتې په وروستیو کې، په پکتیا او بدخشان کې هم «په دیني مدرسو کې له ۱۰ تر ۱۳ کلنۍ پورته نجونو د جذبولو» مخنیوی هم کړي دی.
یوناما اعلان کړی، چې د دې راپور د چمتو کولو په دریو میاشتو کې، دوی په افغانستان کې د طالبانو امربالمعروف ځواکونو له خوا، لږ تر لږه د ۴۵۶ خپل سره نیونې او له ښځو او نارینه وو سره د ناوړه چلند پېښې مستندې کړې دي.
د یوناما د راپور سره سم، دغه کسان د «د په لوېدیځ ډول وېښتانو او ګیرې د سمولو، د موسقۍ غږول او اورېدلو او حجاب نه مراعت کولو» په دلیل د طالبانو د امربالمعروف ځواکونو له خوا نیول شوي او د هغوی سره بد چلند شوی دی.
دغه بنسټ په خپل راپور کې راوړي، طالبانو د روان کال په جولای، اګست او سپټامبر میاشتو کې د ۲۰۹ نارینه وو او ۵۴ ښځو په ګډون ۲۶۳ تنه په یو شمېر ولایتونو کې د خلکو پر وړاندې په دورو وهلي دي.
دغه راز یوناما په یاده موده کې طالبانو د هېواد په یو شمېر ولایتونو کې، د مخکني نظام د امنیتي او دفاعي ځواکونو د وژنې ۱۴، د خپل سره نیونې ۲۱ او د ناوړه چلند او بړونې ۳ پېښې مستندې کړې دي.
په افغانستان کې د ملګرو ملتونو سیاسي استازولۍ په خپل راپور کې راوړي، طالبانو د روان میلادي کال د اګست په ۲۲ مه، هرات ولایت کې د یوه مړي جسد د هرات ښار په مرکز کې نندارې ته وړاندې کړ.
یوناما زیاته کړې، چې طالبانو د دې راپور د چمتو کولو پر مهال، طالبانو په پکتیکا او کابل کې دوه تنه «دیني مقدساتو ته په سپکاوي، د دیني مطالعاتو پر ځای د عصري زده کړو او د تصوف له نوم نه په ناوړې ګټې اخیستنې» سره نیولي او زنداني کړي دي.
د یاد بنسټ د راپور پر اساس، طالبانو د بدخشان ولایت په یو شمېر ولایتونو کې د اسماعیله مذهب لارویان د مذهب بدلون ته هڅولي او یو شمېر کورنۍ یې اړ کړې، چې د خپلو اولادونو نومونه په «سني مدرسو» کې ولیکي او یا هم ۲۰ زره افغانۍ ورکړي.
یوناما په خپل راپور کې راوړي، طالبانو د روان میلادي کال د سپټمبر په اوومه، په کابل، هرات او مزارشریف کې د ملګرو ملتونو کارکوونکي په دغه بنسټ پورې تړولو دفترونو او ادارو ته له ورتګه منع کړې دي.
دغه بنسټ اعلان کړی، چې د دې راپور تر خپرېدو پورې د ملګرو ملتونو ښخینه کارکوونکو په دې بنسټ پورې تړلو دفترونو ته د تګ اجازه نه ده تر لاسه کړې او اوس هغوی له کورونو کار کوي.
د یوناما د راپور پر اساس، د طالبانو د امربالمعروف ځواکونو د روان میلادي کال د جولای له ۱۶ مې تر ۱۹ مې، د کابل ښار له بېلا بېلو سیمو ۶۰ ښځې او نجونې د حجاب نه مراعت کولو له امله نیولې دي.
دغه بنسټ پر دوام وايي، هرات کې د امربالمعروف ځواکونو د روان میلادي کال په سپټمبر میاشت له جبرییل ښارګوتي څو ښځې او نجونې نیولې او وروسته یې بېرته خوشې کړې دي.
د راپور سره سم د طالبانو د امربالمعروف ځواکونو په څو ولایتونو کې «اړینو خدماتو ته لکه، دکانونو، بازار او لېږد رالېږد وسایلو ته له محرم پرته ښځو او نجونو د لاسرسي» مخنیوی کړی دی.
یوناما په خپل راپور کې راوړي، طالبانو په وار وار د روغتیايي خدماتونو وړاندې کوونکو غیردولتي سازمانونو ته ورغلي تر څو وګوري، چې دغه بنسټونو «د جنسیتي بېلوالي، د ښځو حجاب او له ناروغه ښخې سره د مل کس قوانین» مراعتوي او که نه.
دغه بنسټ ویلي، د طالبانو د امربالمعروف ځواکونو کندهار ولایت کې د روغتیايي خدماتو وړاندې کوونکو غیر دولتي سازمانونو ته امر کړی، چې ښځینه کارکوونکې باید محرم ولري.
د یوناما د راپور پر اساس، طالبانو په کندهار ښار کې د غاښونو ټولو کلېنیکونو ته امر کړی، چې د ښځینه ناروغانو له منلو ډډه وکړي.
