د افغانستان د خبریالانو مرکز (AFJC) اعلان کړی، چې په ورستیو دوه لسیزو کې په افغانستان کې د ۲۰ ښځینه خبریالانو په ګډون ۱۳۰ خبریالان او رسنیز کارکوونکي د جنګي پېښو او سازمان شویو جرمونو له امله ژوند بایللی دی.
رخشانه: دغه مرکز نن (یکشنبې د لړم ۱۱ مه) د «خبریالانو پر وړاندې د جرمونو د معافیت د پای ته رسولو نړیوالې ورځې» په مناسبت په یوه اعلامیه کې دغه شمېره خپره کړې ده.
د افغانستان د خبریالانو مرکز په اعلامیه کې راغلي، د ۲۰۲۱ میلادي کال راهیسې تر اوسه د ۲۰ ښځینه خبریالانو په ګډون ۱۳۰ خبریالان او رسنیز کارکوونکي په هېواد کې وژل شوي دي.
دغه مرکز لیکلي، د سزا د خوندیتوب فرهنګ په دلیل په دې له ۹۰ زیاتو پېښو کې قانون او عدالت نه دی پلی شوی.
د افغانستان د خبریالانو مرکز ویلي، پر هېواد د طالبانو په څلورکلنه واکمنۍ کې یې د خبریالانو او رسنیزو کارکوونکو پر وړاندې د حقوقي سرغړونو ۶۴۰ پېښې ثبت کړې دي.
دغه مرکز زیاته کړې، په دې موده کې د طالبانو تر کنټرول لاندې د ملي راډیو تلوېزیون د دوه کارکوونکو په ګډون پنځه خبریالانو د پاکستاني ځواکونو په برید کې ژوند له لاسه ورکړی دی. همدارنګه یاد بنسټ د خبریالانو د نیونې ۲۶۵ پېښې ثبت کړې دي.
د افغانستان د خبریالانو مرکز وايي «د خبریالانو پر وړاندې له سزا د خوندیتوب فرهنګ د دې قربانیانو د عدالت موندنې پر وړاندې خنډ جوړ شوی او د خبریالۍ او رسنیزو فعالیتونو پر وړاندې محدویتونه بې مخینې زیات شوي دي.
اعلامیه کې راوړل شوي، په داسې حال کې، چې په هېواد کې د ننه د رسنیزو فعالیتونو او خبریالۍ ځپنه سخته شوې، او طالبانو هم د غلطو معلوماتو خپرولو او په بهر کې د کارکوونکو خبریالانو د بدنامولو سره د مبطبوعاتو آزادۍ او د خبریالانو خوندیتوب ته یو له جدي ګواښونو څخه ګرځېدلي دي.
د افغانستان د خبریالانو مرکز ویلي، په افغانستان کې له سزا د خوندیتوب فرهنګ واکني، د خبریالانو او رسنیو په وړاندې د ګواښونو، فشارونو او محدودیتونو د زیاتوالي سره، د ټولنې او هېواد د پرمختګ لپاره ناوړه پایلې لري.
دغه مرکز له طالبانو غوښتي، چې د خبریالانو او رسنیو بنسټیزو حقونو ته د درناوي تر څنګ د خبریالانو او رسنیو کارکوونکو پر وړاندې د جرمونو د قربانیانو لپاره د عدالت د تامین په موخه اړین اقدامات وکړي.
دغه راز د خبریالانو مرکز له طالبانو غوښتي، هغه کړنلارې چې د رسنیو آزادي یې بې مخینې محدوده کړې، لغوه کړي او خبریالانو او رسنیو ته اجازه ورکړي، چې پېښې خپرې کړي او حقیقتونه بیان کړي.
