د افغانستان د بشري حقونو لپاره د ملګرو ملتونو ځانګړي راپور ورکوونکي په آسیايي لوبو کې د افغانستان د ځوانانو فوتسال ملي لوبډلې له اتلولۍ د کابل د لوېدیځ د ښځو او نارینه وو په هرکلي خوښي وښوده.
رخشانه: بنټ نن (یکشنبې د لړم ۱۱ مه) په آسیايي لوبو کې د افغانستان د ځوانانو فوتسال ملي لوبډلې له اتلولۍ د کابل د لوېدیځ د ښځو او نارینه وو د هرکلي او خوښۍ ویډیوګانې بیا په خپله اېکس پاڼه خپرې کړې دي.
هغه په آسیايي لوبو کې د هېواد تر ۱۷ کلنۍ د کم عمره فوتسال ملي لوبډلې د اتلولۍ مبارکي هېوادوالو ته ورکړې ده.
د افغانستان د بشري حقونو لپاره د ملګرو ملتونو ځانګړي راپور ورکوونکي دغه اتلولي د ښځو او نارینه وو په ګډون «د افغانستان د ځوانانو د هیلو او استقامت نښې» بللې دي.
تېره ورځ شنبې د (لړم ۱۰مه) د ښځو او ځوانو نجونو په ګډون زرګونه خلک د فوتسال ملي لوبډلې د اتلولۍ په ویاړ د کابل لوېدیځ کې واټونو ته راوتلي وو.
د بحرین په سیالیو کې د هېواد د ځونانو فوتسال ملي لوبډلې د بریا د هرکلي لپاره د پرون د مینه والو په غونډه کې د ځوانو مېرمنو او نجونو شتون خورا د پام وړ وو.
په خواله رسنیو په خپرو شویو ویډیوګانو کې هم لیدل کېږي، زاړه او سپینږیرو هم د آسیا فوتسال اتلانو په هرکلي کې د کابل د لوېدیځ په واټونو ګډا کوله.
له ۱۷ کلنو کم عمره فوتسال ملي لوبډلې د بحرین په لوبو کې، تایلنډ، چین، بحرین او ایران ته ماته ورکړه او له اتلولۍ او د سروزرو مډال سره له دې سیالیو کابل ته راستانه شول.
