د ملګرو ملتونو سرمنشي آنتونیو ګوترش ویلي، خبریالان په ټوله نړۍ کې د حقیقت موندنې په لار کې له ګڼو خنډونو سره مخ دي او په دې لار کې خپل ژوند له لاسه ورکوي.
رخشانه: ګوترش نن (یکشنبې د لړم ۱۱ مه) د «خبریالانو پر وړاندې د جرمونو د معافیت د پای ته رسولو نړیوالې ورځې» په مناسبت پر خپله اېکس پاڼه لیکلي «کله چې خبریالان غلي کېږي، موږ ټول خپل غږونه له لاسه ورکوو.»
هغه له مطبوعاتو د خپلواکۍ څخه د دفاع غوښتنه کړې وايي، «باید ډاډ تر لاسه کړو، هغه کسان چې واکمنانو ته حقیقت وايي، کولی شي له وېرې پرته دغه کار تر سره کړي.»
ګوترش خبریالانو ته د عدالت غوښتنه کړې ویلي یې دی، په ټوله نړۍ کې د خبریالانو له هرو لسو وژونو، ننه پېښې يې ناحل شوې پاتې شوې دي.
هغه لیکلي: «له سزا خوندیتوب په هر ځای کې نه یوازې چې د قربانیانو او د هغوی د کورنیو په حق کې بې عدالتي ده – بلکې د مطبوعاتو پر خپلواکۍ برید، لا زیات تاوتریخوالي ته بلنه او خپله د دېموکراسۍ لپاره ګواښ دی.»
ګوترش غزه د خبریالانو لپاره تر ټولو خونړی ځای وباله او یو ځل بیا یې غوښتنه وکړه، چې په غزه کې د وژل شویو خبریالانو د وژنو لپاره باید خپلواکه او بې پرې څېړنې تر سره شي.
هغه له ټولو دولتونو غوښتي، چې په ټوله نړۍ کې د خبریالانو د ځورونې او وژنو دوسیې وڅېړي او عاملین یې تر قانوني پلټنو لاندې ونیسي.
د ملګرو ملتونو سرمنشي ویلي، د ښځینه خبریالانو پر وړاندې د آنلاین ناوړه ګټه اخیستنې ګواښمن زیاتوالي ته باید پاملرنه وشي، ځکه چې دا ډول کړنې په لویه کچه بې سزا پاتې کېږي او ډېری وختونه د حقیقي نړۍ د زیان لامل کېږي.
نوموړي لیکلي: «ډیجیټلي فضاوې باید د هغه کسانو لپاره چې خبرونه راټولوي او راپورونه ورکوي، خوندي شي.»
د خبریالانو د ملاتړ کمېټې (CPJ)څه موده وړاندې په یوه راپور کې ویلي وو، وروستي درې کلونه د خبریالانو لپاره تر ټولو خونړي وو او یوازې په تېر میلادي کال کې ۱۲۵ خبریالانو او د رسنیو کارکوونکو ژوند بایللی دی.
په افغانستان کې هم طالبانو پر رسنیو او رسنیزو فعالیتونو د پراخو محدودیتونو لګولو سره د لسګونه رسنیو د بندېدو لامل شوي او یو شمېر خبریالان، او رسنیز کارکوونکي او فعالان یې نیولي او زنداني کړي دي.
