افغانستان کې د ملګرو ملتونو د ښځو څانګې (UN Women) اعلان کړی، چې د افغانستان په شمال کې له زلزلې د زیانمونو ښځو او نجونو سره د لومړنیو مرستو په خاطر د ارزونې ښځینه مرستندویانې ورلېږلې دي.
رخشانه: دغه بنسټ نن (دوشنبې د لړم ۱۲ مه) پر اېکس پاڼه د یوه پوسټ په خپرولو سره لیکلي، د افغانستان په شمال کې د تېرې شپې له زلزلې وروسته یې د خپلو سیمه ییزه شریکانو سره یو ځای د ښځو او نجونو د بېړنیو اړتیاوو لپاره همکاري کوي.
د ملګرو ملتونو د ښځو څانګې زیاته کړې، له مرستندویه ښځو چې د زیانمونو ښځو او نجونو سره د لومړنیو مرستو د ارزونې په خاطر لېږل کېږي، ملاتړ یې کوي.
د کډوالو په چارو کې د ملګرو ملتونو عالي کمېشنرۍ پر اېکس پاڼه د یوه پیغام په خبرولو سره ویلي، د افغانستان په شمال کې له شوې زلزلې په ژوره توګه اندېښمن دي.
دغه بنسټ د یادې طبیعي پېښې له قربانیانو سره خواخوږي ښودلې او له ملګرو ملتونو او خپلو شریکانو یې غوښتي، چې په بېړنۍ توګه «د زیانمنو ټولنو» ملاتړ وکړي.
د افغانستان د بشري حقونو لپاره د ملګرو ملتونو ځانګړي راپور ورکوونکي ریچارد بنټ پر خپله اېکس پاڼه د یوه پیغام په لیکلو سره د هېواد په شمال کې د شوې زلزلې د قربانیانو له کورنیو سره خواخوږښي ښودلې او د بشردوستانه غبرګون غوښتنه یې کړې ده.
د طالبانو د لومړنیو معلوماتو پر بنسټ د هېواد په پنځو شمالي ولایتونو کې د تېرې شپې د ۶.۳ درجې زلزلې له امله ۲۷ تنو ژوند له لاسه ورکړی او ۷۳۰ تنه نور ټپیان شوي دي. دغه طبیعي پېښې پر ځاني زیانونو سربېره ګڼ مالي زیانونه هم اړولي دي.
د ملګرو ملتونو په ګډون یو شمېر ګاونډیو هېوادونو هم د دې طبعي پېښې د قربانیانو له کورنیو سره خواخوږي ښودلې او د ټپیانو سره د مرستې په موخه یې خپل چمتوالی اعلان کړی دی.
