طالبانو اعلان کړی، چې د لومړنیو معلوماتو پر اساس د هېواد په شمال سمنګان او بلخ ولایت کې د تېرې شپې په زلزله کې له ۲۰ زیات کسان مړه او ۳۲۰ نور ټپیان شوي دي.
رخشانه: د طالبانو د عامې روغتیا وزارت ویاند شرافت زمان نن سهار (دوشنبې د لړم ۱۲ مه) په یوه ویډیو کې ویلي، د تېرې شپې د زلزلې له امله په سمنګان ولایت کې له ۲۰ زیات کسان مړه او له ۳۲۰ زیات ټپیان شوي دي.
هغه ویلي، د ژغورنې ټیمونه سیمې ته لېږل شوي او د دغې طبعیي پېښې ټپیان د درملنې په موخه روغتونونو ته لېږدول کېږي.
بلخ کې د طالبانو د عامې روغتیا ریاست ویاند کمال ځدراڼ هم ویلي، د تېرې شپې په زلزله کې په دې ولایت کې ۴ تنه مړه او ۱۲۰ نور ټپیان شوي دي.
هغه زیاته کړې، تر اوسه د څلورو تنو جسدونه مزارشریف ښار کې د بوعلي سینای بلخي حوزوي روغتون ته لېږدول شوي دي.
د ځدراڼ په وینا، د دې طبیعي پېښې یو شمېر ټپیان هم د درملنې لپاره دغه روغتون ته وروړل شوي دي.
نوموړي د دغه کسانو کره شمېره او جنسیت نه دی مشخص کړی او د هغوی د روغتیايي حالت په اړه یې هم څه نه دي ویلي.
په ورته مهال مزارشریف ښار کې د بوعلي سینا بلخي روغتون باوري سرچینې وايي، د ټپیانو منځ کې ښځې او ماشومان هم شامل دي.
دا شمېرې وروستۍ نه دي، ښايي هره شېبه د هېواد په شمال کې د شوې زلزلې د قربانیانو شمېر زیات شي.
بلخ، سمنګان او د هېواد یو شمېر نور شمالي ولایتونه تېره شپه شاوخوا یوه بجه سختې زلزلې ولړزول.
د امریکا د زلزلې سنجونې مرکز د هېواد په شمال کې د تېرې شپې شوې زلزله د ریشتر په کچه ۶.۳ درجې سنجولې ده.
دې زلزلې ټکانونه په سمنګان، بلخ، فاریاب، سرپل، تخار، کابل او کندوز ولایتونو کې هم احساس شوي دي.
ملګرو ملتونو هم پر خپله اېکس پاڼه لیکلي، چې د دوی او د شریکانو ټیمونه یې د افغانستان په شمال کې زلزله ځپلې سیمه کې شتون لري، تر څو اړتیاوې وارزوي او بېړنۍ مرستې وړاندې کړي.
دغه بنسټ ویلي، د افغانستان په ختیځ کې له څو اوونیو وړاندې زلزلې وروسته دا دویم ځل دی، چې په دې هېواد کې سخته زلزله کېږي.
