هرات ښار کې سرچینې وايي، په دې ولایت کې د طالبانو د امربالمعروف ریاست، په تازه امر کې دولتي ادارو او حوزوي روغتونو ته د «بې چادرۍ او عربي تورټکري نه لروونکو مېرمنو» په ورتګ بندیز لګول شوی دی.
رخشانه: هرات ښار کې لږ تر لږه څلورو سرچینو رخشانې رسنۍ ته ویلي، دغه محدودیت نن سهار (چهارشنبې د لړم ۱۴ مه) لګول شوی او بې چادرۍ ښځې دولتي ادارو ته له ننوتلو راګرځول شوې دي.
د سرچینو په وینا، طالب ځواکونو د دې ډلې د اداري کمپلېکس، شپېته بستریز روغتون او په هرات کې د پوهنې ریاست په دروازو کې شتون درلود او د «چادر نماز او مانتو جامو اغوستونکو ښځو او نجونو» د ننوتلو مخنیوی یې کاوه.
په خواله رسنیو خپرې شوې ویډیوګانې ښيي، هغه ښځو او نجونو چې چادرۍ یې نه وې اغوښتې، د هرات حوزوي روغتون ته د ننوتو اجازه نه تر لاسه کوي او د دروازې تر شاه ولاړې دي.
په ورته وخت هغو مېرمنو، چې د اداري اسنادو د طی مراحل لپاره یې دولتي ادارو ته مراجعه کړې، ویلي، په ساعتونو ساعتونو د دولتي ادارو د دروازو تر شاه درول شوې او د ننوتو اجازه نه ده ورکړل شوې.
هرات ښار کې یوې سرچینې چې همدا نن د خپلې برېښنايي پېژندپاڼې د پاڼو د طی مراحلو لپاره، د طالبانو د احصایې ادارې ته مراجعه کړې وه ویلي، په ساعتونو ساعتونو د اداري کارونو د ترسراوي لپاره د تړلو دروازو تر شاه انتظار ولاړه وه.
هغې ویلي: دا [طالبان] هره ورځ یوه نوې ستونزه راپیدا کوي. یوه ورځ انټرنېټ پرېکېږي او اوس هم وايي له چادرۍ پرته حق نه لري، چې خپل کارونه مخ ته یوسۍ، زه څنګه بېرته کور ته لاړه شم او چادري له کومه کړم؟»
هرات کې د طالبانو د دولتي ادارې یوه کارکوونکې هم رخشانې رسنۍ ته ویلي، دغه محدودیتونه نه یوازې د ښځینه مراجعینو، بلکې د دولتي ادارو ښځینه کارکوونکو ته هم وضع شوي دي.
د هغې په وینا، ډېره هغه ښځو ته چې په دولتي ادارو کې کار کوي او چادرۍ یې نه وې اغوستې، هم ادارې ته د ننوتو اجازه نه ده ورکړل شوې.
هغې و ویل: «تېره ورځ غرمه دولس بجې یې موږ رخصت کړو، تر څو لاړې شو او د ځان لپاره چادرۍ واخلو، خو موږ دا امر جدي ونه ګاڼه، نن سهار چې کله ادارې ته لاړم، موږ ته یې د ننوتو اجازه رانه کړه او ویل یې باید چادرۍ واغوندۍ.»
یوې بلې سرچینې هم رخشانې رسنۍ ته ویلي، هرات ښار کې د طالبانو د امربالمعروف ځواکونو ښاري موټر چلوونکو ته امر کړی وو، چې بې چادرۍ ښځې په خپلو موټرو کې سپرې نه کړۍ.
په ورته وخت یوې بلې سرچینې ویلي، د طالبانو د امربالمعروف ریاست تېره ورځ د پلورنځیو صنفي غړو سره، د هراتي ښځو او نجونو د حجاب په تړاو غونډه کړې وه او هغوی ته یې امر ورکړی، چې «هېڅ ښځه حق نه لری، له چادرۍ یا عربي حجاب او مول پرته هټۍ ته ننوځي.»
هرات ښار کې د طالبانو د امربالمعروف ځواکونو څه موده وړاندې، د دې ښار په ۶۴ متره سړک کې «جمعه بازار» ته د ښځو او نجونو د ورتګ مخنیوی کړی وو.
