ننګرهار کې سیمه ییزې سرچینې وايي، د یوه سرپرېکړي او ټوټې ټوټې ماشوم جسد دوه ورځې وروسته د دې ولایت په کامې ولسوالۍ کې موندل شوی دی.
رخشانه: د ننګرهار کامې ولسوالۍ کې دوه سیمه ییزه سرچینو رخشانې رسنۍ ته ویلي، د دې ماشوم جسد نن (چهارشنبې د لړم ۱۴ مه) د یادې ولسوالۍ په کهېک کلي کې موندل شوی دی.
د سرچینې په وینا، ماشوم پنځه کلن وو او دوه ورځې وړاندې د ناپېژنده کسانو له خوا تښتول شوی وو. د هغه جسد د ګڼیو له یوې کروندې موندل شوی دی.
د رخشانې رسنۍ سرچینو زیاته کړې، د دې ماشوم جسد په داسې حال کې موندل شوی، چې سر او غوږونه یې د چاقو په واسطه سوري سوري شوي دي.
سرچینې د دې ماشوم د جنسیت او هویت په اړه څه نه دي ویلي او د تښتولو کېدو دلیل یې هم نه دی روښانه کړي.
د سیمې خلک د دې پېښې د رامنځ ته کېدو څخه په اندېښنه کې دي وايي، دا څوم ځل دی، چې کامې ولسوالۍ کې د انسان تښتونې او ماشومانو د وژنې پېښې رامنځ ته کېږي.
هغوی طالبان په ټمبلۍ تورن کړل او د دې جنایتونو د عاملانو د ژر تر ژره پیدا کېدو او سزا غوښتنه یې وکړه.
د دې پېښې د څرنګوالي په اړه زیات جزیات په لاس کې نشته او ننګرهار کې سیمه ییزه طالب چارواکو هم تر اوسه په دې اړه نظر نه دی څرګند کړي.
په وروستیو څو کلونو کې په ننګرهار کې د ماشومانو د وژنو پېښې د خلکو د اندېښنې وړ ګرځېدلې، له دې ډلې کولی شو د دې ولایت په مرکز جلال آباد ښار کې د یوه اته کلن ماشوم وژنې ته اشاره وکړو، چې ناپېژانده کسانو د جوارو په کرونده کې د «چاقو» په واسطه وژلی وو.
